| Menu |
 |
 
 
| Wat is. |
|---|
|
Hai ken goud kamlötten hij is een flinke eter
|
|
|
Grunneger resepten.
Kniepertjes
Wat mout der in:
Aanderhaalf kan wotter, twijenhaalf ons bloum, ain aai, 125 gram botter, 2 ons sukker, n haalve theelepel knail.
Wat mout je hebben:
n Woafeliezer. n Zeef.
Hou mout je t doun:
Moak t wotter waarm, nait koken.
lös de sukker in t wotter op.
loat de botter in t sukkerwoater smelten.
klop t aai lös.
dou de bloum deur de zeef.
Reur t aai, de knail, en t sukkermengsel deur nkander netzolaank dat je n mooi glad deeg kriegen.
Loat boudel n nacht stoan mit n douk der overhén, kiek oet veur kat en hond.
Aanderdoags:
Moak t woafeliezer goud hait.
woafeliezer goud invetten.
moak koegeltjes zo groot as n dikke knikker van t deeg.
leg n koegeltje deeg in t midden van t woafeliezer.
woafeliezer stief dichtdrukken.
ain tot twij menuten wachten.
woafeliezer open, kniepertje omdraaien.
dit doun je net zolaank tot kniepertje goud goar en mooi van kleur is.
hoal t kniepertje der veurzichteg oet en leg t vot.
|
|
| Nog meer? |
Joa, as ie nog n echt Grunneger resept hebben den zol t mooi weden ie dij opsturen zollen.
|
| Woarom? |
Omdat wie dij der den bie zetten kennen, ie willen toch ook nait aaldoage graauw aarten, brij, klont, haite bliksem, oetsmieters, pankouk of stampot eten (gain kwoad woord over graauw aarten, brij, klont, haite bliksem, oetsmieters, pankouk of stamppot, doar nait van).
En aaldoage kruudkouke bie t kovvie doar wòr je ook n moal weer flaauw van.
Nij-joarsrollechies smoaken in maai ook wel goud...
|
| En hou mout dat? |
Op de openingsbladziede staait n formeliertje doar ken je dat mooi even inzetten.
|
| En nou? |
| Brij of klont moaken, mosterdsoep koken, oetsmieter, pankouk of kruudkouke bakken. Stampot, haite bliksem, hait bier of boerenjonges moaken mag ook. |
 |
|
|
