Grunneger resepten.

---

Euliekouken:

Veur vaaier man (minder as t dikke eters binnen).

Wat mout der in:

n Pond bloum, n puutje dreugde gèst, n tuutaai, n haalf kan koumelk, twij teelepels zolt, n onze rezienen, n onze krìnten, drij eetlepels fienmoakte sekoade, n appel.

Hou mout je t doun:

Loat rezienen en krìnten even wellen in n komme mit laauw wotter.
Loat ze den goud oetlekken.
Schil de appel, boor t klokhoes der oet en hoal hom over n grovve raspe.
Dou de bloum in n komme en ruirer de gèst der deur.
Moak in t midden n koeltje en breek hier de tuutaai in.
Moak de melk haandwaarm en gait t in t koeltje.
Dou t zolt der bie.
Begun in t midden mit kloppen (mag ook mit mikser) en waark noar de boetenkaant tou,
Schep de rezienen, krìnten, sekoade en raspde appel deur t beslag.
Deurgoan tot je n mooi glad beslag hebben.
Dou n schone slovve teedouk over de komme.
Zet komme op n waarm stee (bie kaggel).
Loat t beslag op zien minst n uur riezen, t wordt zowat n moal zoveul.
Moak de eulie zo hait dat damp er òf slagt.
Mit twij, in eulie dompelde, lepels (ijsschepke kin ook) ballechies van t beslag moaken en in de haite eulie glieden loaten.
As euliekouken zuch nait vanzulf keren den mout je ze noa drij menuten even helpen, loat ze den aan aander kaant nog twij menuten bakken.
Hoal de euliekouken mit n schoemspoan oet paan en loat ze oetlekken op kraant (keukenpampier mag ook).

Dou der wat poedersukker bie. Lekker man!

---

---