DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
t Gaait liek op
 
het gaat gelijk op

Geesjen Doddema-Heidema.

Hejje t ook lezen lu.

n Beschaauwen over n kraandebericht: n opvalend nijsbericht dij d'ofgelopen weke te lezen was.


Week 0352
Kerst. Kerst 2003

Hejje t ook lezen lu?
Wie Nederlanders dinken nog aal in guldens. Dat wil zeggen, 68% rekent de boudel nog om in guldens. Doar heur ik ook bie. Ik wait nait hou t joe vergaait, mor as ik in de winkel n netje mit vaar grapefruits in d'handen heb en ik lees dat ze E 2,49 kosten, din reken ik dat eerst om en din leg ik ze weer in t schap, omreden ik vanzulf nait van plan bin om bienoa ain gulden vatteg te betoalen per stuk. En din lees ik ook nog dat de recessie ons thuusholdt mit Kerst. Der goan mor ais even 25.000 minsen minder op verkansie as veureg joar. En hou komt dat nou? Ekenomisch onzekere tieden binnen doar de schuld van, het n veuraanstoand instituut veur toerisme bedocht.

Zol dat woar wezen? Ik reken dat dat meer komt omdat de lu in de rekreoatsie en toerisme ook nog aal in guldens dinken, mor din aansom. Dij hebben gewoon het guldenstaikentje veur de priezen inruild veur n eurotaiken. Net zo as in de restaurants. Want wel kin t zuch nou nog veroorloven om uut eten te goan tiedens ain van de kerstdoagen? Hejje de priezen van de menu's zain in kraande? Veur zo'n pude mit geld kin ik thuus ook hail wat schiers op toavel zetten en din kinnen wie der ook nog wel twij doage van eten. Gain wonder dat der al restaurants binnen, dij t haalve personeel mit de feestdoagen gerust vrij geven kinnen.

En kerst wordt aal onaantrekkelker moakt veur de gewone man. Neem nou de kerstbomen. Van de brandweer maggen in alerhaande gebaauwen gain echte kerstboom meer stoan, zulfs gain bomen dij spesioal mit n brandwerend middel behandeld binnen. Dus in scholen, kerken, kroegen en wait ik woar nog meer kinnen wie gain lekkere dennenaaldengeur meer opsnoeven, mor zitten we opscheept mit plestieken "bomen", dij as wie gelok hebben nait noar plestiek roeken. Din zol je hoast willen, dat je dicht bie de toiletten zitten zollen. Krieg je meschain zo nou en din toch nog n vleugje dennegeur mit.

En der mot nog meer betutteld worden. Doar binnen lu van n ondernemersorganisoatsie, dij vinden dat wie aankopen in winkels tiedens de kommende kerstdrokte nait meer mit kontant geld betoalen maggen, Dij prachtege euro's van ons binnen noamelk veul te makkelk noa te moaken. Braifies van honderd worden nait aksepteerd en dije van viefteg worden aan ale kanten bekeken. Wie mouten ons legitimeren as we betoalen. Ze vinden aigenlieks dat wie verplicht pinnen mouten. En wel dat nait wil, krigt zien bosschoppen nait mit. Ik zai mien taande van 84 al in de winkelriege stoan, mit twij bosschoppen op heur rollator. Zai mout n braifke mitnemen, om te ontholden, wat ze kopen mot, dus ie kinnen joe wel veurstellen, dat zai nait recht ain van de handegsten is mit heur pinkode. Staarker nog, ze het hom wel aargens opschreven, mor woar? Zulfs dat is zai alweer vergeten. En dij kin din heur spul nait mitkriegen? Wie zellen mor hopen, dat dat weer zo'n ballon was, dij oploaten is deur dij organisoatsie, mor dij gaauwachteg weer deurprikt wordt.

Ach, wat zel ik mie ook opwinden. Lu, ik wins joe schiere feestdoagen, mit of zunder verkansie, mit n echte of n kunstboom, mit n bienoa nait te betoalen kerstdiner of mit joen stamppot sniebonen. Ik hoop veur joe, dat je dij doagen deurbringen zo as je dat zulf t laifste willen. Mocht dat nait zo wezen din mout je mor rekenen: volgend joar beter, want veurdat je derop verdocht binnen is t weer kerstmis.

Geesjen Doddema-Heidema

Pieltje noar boven

Al eerder:
| 0350 | 0348 | 0346 | 0344 | 0342 | 0340 | 0336 | 0334 | 0327 | 0325 | 0323 | 0321 | 0319 | 0317 | 0315 | 0313 | 0305 | 0303 | 0301 | 0251 | 0249 | 0247 | 0245 | 0244 | 0242 | 0240 | 0238 | 0236 | 0234 | 0226 | 0224 | 0222 | 0220 | 0218 | 0216 | 0214 | 0212 | 0210 | 0208 | 0206 | 0204 | 0202 | 0152 | 0150 | 0148 | 0146 | 0144 |

De Schriefster
Noam: Geesjen Doddema-Heidema
Geboren: 1953
Woont in: Haarstee
Schrift al: sunds 1991

Ik treed soamen mit mien man op, hai zingt, ik lees aigen grunneger verhoalen en gedichten veur.

Ie zain
Femilie Doddema is goud mit t Grunnegs aan d loop.

Ie ook?
Kiek den even op de openingsbladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.