DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Vatteg
 
veertig

Geesjen Doddema-Heidema.

Hejje t ook lezen lu.

n Beschaauwen over n kraandebericht: n opvalend nijsbericht dij d'ofgelopen weke te lezen was.


Week 0251
Ies.

Hejje t ook lezen lu?
Wat n gedounte om dat ies, nait? Komt der eindelk n beetje ies, moakt elk en aine zuch doar weer drok om. Eerst al dij twij dörpkes dij mekoar t licht in de ogen nait gunnen om de eerste marathon op netuuries te organiseren. Veenoord en Noordloaren binnen aalbaaide in de race. Nou, Noordloaren het wonnen, veur t eerst in vieftien joar is t heur din lukt om de wedstrieden op te aaisen.

In Winschoten wollen horeka-ondernemers n echt sprookjesachteg winterlandschop moaken op t maarktplain. Zai spoten t haile plain onder wotter en woarachteg t was lokt. n Spaigelgladde loag kwam der overhin. Mor ja, dou de gemainte doar lucht van kreeg rukde dij geliek mit groot materieel uut om der zolt over te streuen. Dat kon ja nait, dat was ja veul te gevoarlek! Boetendes was der gain vergunnen aanvroagd. Nou, dat zel heur wel t maiste stoken hebben. Ze konden der dus gain senten aan verdainen. "Stel joe veur," zeden ze, "dat elk en aine zuk soort dingen mor op aigen holtje doun zol, woar zol dat din heen goan mit de vaaileghaid van t dörp."
Ach, meschain is t ook mor beter zo. De kroeglopers zellen zo wel al muite genog hebben om de bainen onder t gat te holden as ze weer op huus aan goan, loat stoan as der ook nog n loage ies op t plaain ligt.

En din binnen der nog van dij haalfmalen dij dinken dat ze al op t Paterswoldse meer scheuveln kinnen as der nog mor twij sentimeter ies op ligt. Plietsie mos der maank om dij hampels van t ies te hoalen. t Was vot landelk nijs. Nou, ja, Paterswolde is zo ook weer n zetje op de koarde zet.

Ja, dat haalfbakken ies, ie mouten der mit uutkieken. Bie ons op de Pageplas zagen gemaintewaarkers n man rondtoeren en opains was e vot. Bie kontrole zagen ze n gat in t ies en doarin dreef n petje. Vot groot alarm. Eerst kwam der n ambulance aangieren. Doarnoa vlogen twij grode brandweerauto's mit sirene en zwaailicht bie mie veur t huus langes. Dou nog n wotterongevallen-auto, mit n rubberboot derachter. Vervolgens kwam de traumahelikopter overvlaigen. En doarnoa nog twij brandweerbussies, dij hail uut stad aanrukt wazzen. Plietsie-auto derbie en mor zuiken. t Leek nait te best, anderhaalf uur zat de scheuvelloper nou al onder t ies dochten ze, man, doar was ja gain redden meer aan. En opains kwam de man zulf deraan wandeln en keek stokverwonderd noar aal dij drokte. Wat zel hier wel gebeurd wezen docht e. Hai was zuch gaauw even doezen goan, noadat e deur t ies zakt was en nou wol e zien klompen en fietse weer ophoalen. t Bleek dat aal dij konsternoatsie om hom was. Hai was boetengewoon ontdoan, zeden ze op de radio. Joa, dat dank joe de koekoek. Veur de man zulf is t mor goud, dat t vaals alarm was, vanzulf.
Mor, wat ik mie nou ofvroag: Woar zel de reken noar tou goan van aal dij inzet? Dat kin ons as belastenbetoalers nog hail wat kosten ook. Mor doar zellen wie wel nooit achterkommen, ducht mie.

Lu, as ie mie nou n plezaaier doun willen. Kiek goud uut, veurdat je joe op glad ies begeven! Ik wol joe geern volgende moal weer trevven, hier op Dideldom.com.

Geesjen Doddema-Heidema



Al eerder:
| 0350 | 0348 | 0346 | 0344 | 0342 | 0340 | 0336 | 0334 | 0327 | 0325 | 0323 | 0321 | 0319 | 0317 | 0315 | 0313 | 0305 | 0303 | 0301 | 0251 | 0249 | 0247 | 0245 | 0244 | 0242 | 0240 | 0238 | 0236 | 0234 | 0226 | 0224 | 0222 | 0220 | 0218 | 0216 | 0214 | 0212 | 0210 | 0208 | 0206 | 0204 | 0202 | 0152 | 0150 | 0148 | 0146 | 0144 |

De Schriefster
Noam: Geesjen Doddema-Heidema
Geboren: 1953
Woont in: Stadsknoal
Schrift al: sunds 1991

Ik treed soamen mit mien man op, hai zingt, ik lees aigen grunneger verhoalen en gedichten veur. Veur mien radiopergram bin ik wekelks n beetje aan t maaljoagen mit n kraandebericht.

Ie zain
Femilie Doddema is goud mit t Grunnegs aan d loop.

Ie ook?
Kiek den even op de openingsbladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.