DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Goud
 
goed, goederen, kleren

Geesjen Doddema-Heidema.

Hejje t ook lezen lu.

n Beschaauwen over n kraandebericht: n opvalend nijsbericht dij d'ofgelopen weke te lezen was.


Week 0216
Rekord fotokopiëren.

Hejje t ook lezen, lu? Minsen doun de gekste dingen om in t "Guinness Book of Records" te kommen.
n Zet veur Maaljan op n poale zitten of op n dak. Vaar doage achter mekoar schoaken. Of zo veul meugelk aaier eten in n bepoalde tied, woarbie ze maisttied de kop gruin en geel hebben as ze t wonnen hebben, staarker nog, ik heb mie zulfs vertellen loaten dat der bie elke deelnemer onder toavel n emmertje staait veur as ze n beetje mizzelk worden.
Vaarentwinteg uur rondjes draaien op n plof, of zoveul meugelk minsen in n lutje autootje proppen, woarbie de neuzen platdrokt worden tegen t roam, en dij lu hebben nog gelok, want der binnen ook gounent dij de zwaitvouten van n aander onder de snuvverd kriegen. Of der binnen lu dij perbaaiern de langste metworst te moaken en vot noatied binnen weer aander megoochempies dij n pogen doun om dij worst zo snel meugelk op te eten, zulfs al mouten ze spijen as n raaiger.

En nou is der weer n nij rekord. Der is n Belg dij het n wereldrekord fotokopiëren vestigd. Ja, ie lezen t goud: fotokopiëren.
Nou wait ik nog hail goud hou zuks dom waark zowat is. Ie leggen n dokument in t apperoat, ie drukken op de stroom-knobbe, wachten even tot t apperoat opwaarmd is, ie stellen t aantal kopieën in dij je hebben willen en doar flottert t hin. As je 99 kopieën hebben willen din duurt t even, mor ie kinnen der mit d'aarms over mekoar bie stoan wachten.
Want wees ais eerlek, wat dou je der nou uuteindelk zulf aan. De originelen der n beetje op volgorde inleggen en nait aal te schaif vanzulf. As je meer as 99 hebben mouten, din mout je opnij t knopke instellen, mor dat is din ook alles.
Bieholden op n pepiertje houveul je moakt hebben is ook ja nait aal te stoer. En wat is nou t slimste wat joe overkommen kin, dat is dat t pepier op is, of de inkt, of dat der n pepiertje vastdraait in t mesien. En dat is t aal.
Doar zol nou toch gain verstandege Grunneger op t idee kommen om zokswat aan te melden as rekord. Slimmer nog, dij lu bie t "Guinness Book of Records" dat mouten wel hoast dodderkoppen wezen as ze dat as prestoatsie aanmaarken en t opnemen in t grode bouk.

En as ie dochten dat dizze Belg ook nog veur poelegrap en oardeghaid der aan begonnen is, gewoon om te kieken houver of e kommen kon, niks hor. Hai het gewoon n fotokopieerbedrief.
Hai haar de opdracht kregen van n Hogeschool, dij n miljoun kopieën hebben mos en rad n beetje. Dus hai het zoch eerst ais n nij mesien aanschaft.
Aine dij, hol joe vast, kopiëren, nieten, perforeren en sorteren kin, mit ales derop en deraan. Hai moakt 70 kopietjes per menuut en waarkt as n idioot. Dij mesien din, hè? Dag en nacht het e draaid, de aigenoar wuir of en tou vervangen deur zien vraauw, din kon e zulf even sloapen, mor t kwam dik veur mekoar om t waark binnen de opdrachtstied kloar te kriegen.

Noa dijtied docht de kirrel inains dat t wel ais n rekord wezen kon en het n aanvroag indaind bie de Nederlandse ofdailen van t rekord-bouk.
En inderdoad: hai wordt in de volgende editie opnomen. Toch bizunder hor. Dat aine mit t doun van zien waark in dat bouk terechte kommen kin.
As ik nou ais doezend moal dezulfde uutdrokken achter mekoar op n vel pepier typ, zol dat wat wezen? Der is vast nog gain ain hampel op zo'n idee kommen. As ie nou even mittellen, want ik mot din wel vaar getugen hebben, omreden ik gain deurwoarder bie de haand heb. Nou doar goan we, hor.
Veur poelegrap en oardeghaid, veur poelegrap en oardeghaid, veur poelegrap en oardeghaid, veur poelegrap en oardeghaid, veur poelegrap en oardeghaid, veur poelegrap en oardeghaid, veur oardeghaid en ..., hè, dat is fout, mor weer vannijs: veur poelegrap en oardeghaid, veur poelegrap en oardeghaid, veur poelegrap en oardeghaid, veur poelegrap en oardeghaid ...

Geesjen Doddema-Heidema



Al eerder:
| 0350 | 0348 | 0346 | 0344 | 0342 | 0340 | 0336 | 0334 | 0327 | 0325 | 0323 | 0321 | 0319 | 0317 | 0315 | 0313 | 0305 | 0303 | 0301 | 0251 | 0249 | 0247 | 0245 | 0244 | 0242 | 0240 | 0238 | 0236 | 0234 | 0226 | 0224 | 0222 | 0220 | 0218 | 0216 | 0214 | 0212 | 0210 | 0208 | 0206 | 0204 | 0202 | 0152 | 0150 | 0148 | 0146 | 0144 |

De Schriefster
Noam: Geesjen Doddema-Heidema
Geboren: 1953
Woont in: Stadsknoal
Schrift al: sunds 1991

Ik treed soamen mit mien man op, hai zingt, ik lees aigen grunneger verhoalen en gedichten veur. Veur mien radiopergram bin ik wekelks n beetje aan t maaljoagen mit n kraandebericht.

Ie zain
Femilie Doddema is goud mit t Grunnegs aan d loop.

Ie ook?
Kiek den even op de openingsbladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.