DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Piene
 
pijn

Geesjen Doddema-Heidema.

Hejje t ook lezen lu.

n Beschaauwen over n kraandebericht: n opvalend nijsbericht dij d'ofgelopen weke te lezen was.


Week 0224
Pappie wil n buggy.

Hejje t ook lezen lu?

Pappie wil gain kinderwoagen, wel n buggy. n Kraandekop, woarbie bie mie votdoadelk al de fantezie op de loop ging. Ik zag zo'n overjoarege bloaze veur mie mit op zien koale kop n kleurege klödde, dij slim zien best dee om indrok te moaken op n modepobbe noast zuch, dij, onherkenboar moakt deur n zunnebrille en n slim opzichteg doukje, heur laange hoaren wappern luit in de wind. Man en vraauw, mit heur baaident ommetoerend in, wat deurgoan mos veur n automobiel. Mor din zunder dak, deuren en n kovverbak. Ie kinnen dat wel: van dij lu dij bie n veul te kolle dag zok vernikkeln loaten in n soortement van cabrio, mor din aine dij d'aandacht trekt van elk en ain dij hom langs glieden zugt.

Mor nee, t artikel ging in n hail aandere richten. Ie kinnen tegenswoordeg ofstudaaiern op t onderwaarp: "imago van het voaderschap" las ik. Nou vroag ik joe! t Imago van t voaderschap. Wat mouten wie ons doar din wel bie veurstellen. Nou, t bliekt dat manlu nait veul belang hebben bie de wereld van de zörg. As je dat aal zo lezen, zol je hoast nog dinken dat kinder opvouden heur n zörge wezen zel. En hou komt dat nou? t Schient dat dat n wereld van ronde vörms, zaachte kleuren en vraauwelk toalgebruuk is, en doar kin dij stoere pabbe niks mit.

As veurbeeld wordt n scheerapperoat ten tonele voerd. Lady-shaves binnen voak rond, mit n mooi zachtgruin kleurtje, der zit mor ain knoppie op, veur t aan en uutdoun en boetendes zitten der gain schroeven in, om hom uutnander te slopen en onderdailen te vervangen. Nee, din scheerapperoaten veur manlu. Zwaart of metoalkleureg, vaarkant en n bulde standen, dij de deursnee kirrel volgens mie nooit bruken zel, mor alla. t Gaait derom dat de meugelkheden derop zitten, nee din?

Ook de kinderwoagen wordt der aan de roadens biesleept. Doar wil de hedendoagse pabbe ook nait achterlopen. Nee, van dij stoere buggies op drij dikke roadens, dat is nog es even wat, doar duurven ze zuch wel mit te vertonen. En nou haar ik t mit joe n zetje leden nog over de ofstandsbedainen, wait je wel. Ik haar op mien menaaier de prebleem-manlu hailemoal inpakt, deur overaal n ofstandsbedainen bie te levern. Din zollen ze in mien ogen floitend t huusholden doun. Niks hor, mooi nait woar. Manlu binnen gek op displays, ie waiten wel van dij lutje kiekvinstertjes woar alerhaande gegevens op te stoan kommen.

Volgens de dokterandus in de dop, dij kommende weke ofstudaaierd is dat veur aal dij manlu t toppunt van techniek. Der mouten van dij kiekvinsters op stofzoegers kommen, zodat je zain kinnen, hou vol of de stofpude al is. Joa, joa, ik zai t al veur mie. Dij kirrels mit de stofzoeger deur t huus en mor loeren noar de digitoale gegevens. Intied letten ze vanzulf nait op woar ze tegenaan kleddern, of ze wel alles opzoegen en of heur kind intied ook n vinger in t stopketakt stekt. Manlu mouten op heur strepen stoan goan, volgens de onderzuiker. t Wordt hoog tied dat ze ais veur zuchzulf opkommen en zuch nait langer in t houkje drokken loaten van de klungelege types.

Mor din lutje Geert. Ie mouten mor n pabbe hebben dij joe allind mor drokken wil in n buggy. Mit n degelke olderwetse kinderwoagen komt lutje Geert mit zien pabbe aans t huus nait meer uut. Kiek, der binnen onderzuiken zat, dij aantonen dat ter allerhaande oorzoaken binnen veur psychische perblemen bie de kinder. Dit liekt mie nou echt wat veur zo'n onderzuik. Nou ja, n onderzuik is volgens mie nait ains neudeg. Lutje Geert krigt mit zo'n pabbe vervast n minderwoardeghaidskompleks. t Gaait om nait om zien zeun, mor om t raive. En dat drokt zwoar op n kinderzieltje. Dij lutje Geert, dij mot loater n bult kompenseren, dij komt vervast tiedens zien penopauze nog in n buggy terechte.

Geesjen Doddema-Heidema



Al eerder:
| 0350 | 0348 | 0346 | 0344 | 0342 | 0340 | 0336 | 0334 | 0327 | 0325 | 0323 | 0321 | 0319 | 0317 | 0315 | 0313 | 0305 | 0303 | 0301 | 0251 | 0249 | 0247 | 0245 | 0244 | 0242 | 0240 | 0238 | 0236 | 0234 | 0226 | 0224 | 0222 | 0220 | 0218 | 0216 | 0214 | 0212 | 0210 | 0208 | 0206 | 0204 | 0202 | 0152 | 0150 | 0148 | 0146 | 0144 |

De Schriefster
Noam: Geesjen Doddema-Heidema
Geboren: 1953
Woont in: Stadsknoal
Schrift al: sunds 1991

Ik treed soamen mit mien man op, hai zingt, ik lees aigen grunneger verhoalen en gedichten veur. Veur mien radiopergram bin ik wekelks n beetje aan t maaljoagen mit n kraandebericht.

Ie zain
Femilie Doddema is goud mit t Grunnegs aan d loop.

Ie ook?
Kiek den even op de openingsbladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.