DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Adderroet
 
varens

Geesjen Doddema-Heidema.

Hejje t ook lezen lu.

n Beschaauwen over n kraandebericht: n opvalend nijsbericht dij d'ofgelopen weke te lezen was.


Week 0303
Dik in t nijs.

Hejje t ook lezen lu?
As je wat aan de stevege kaande binnen din stoan ie en joen mitlie(n)ders oardeg in de schienwaarpers. Nait allinneg in de kraanten mor ook in de doamesbloaden. Gain blad kin je oppakken of de boetenkaande ropt joe tegemuide: "Slanke recepten! Tips van de diëtiste! Dou het ofstreepdieet! Binnen ie ook zo uutdijd noa de feestdoagen?" En aal dat soort kreten meer. En din komt der weer de aine tip noa de aandere. Ie kinnen kaizen uut dieten, slankhaidsoefens, poedertjes en soepjes dij je eten mouten en wat wait ik nog meer.

Ook in de kraande wazzen de berichten nait van de locht. As je nou wat overgewicht hebben en n kind adopteren willen, mouje nait emigreren noar Austroalië. Doar het n 21-joarege vraauw van 120 kilo t lid op de neuze kregen. De adoptiekemmissie het heur wogen en te licht bevonden om zo mor ais te zeggen. En deur heur zwoarlieveghaid het zai meer kans om zaik te worden en vroug dood te goan en kin dat kind dus nait opvouden tot e volwozzen is.

As je op joen vattegste last hebben van overgewicht din is dat ook al nait te best. Want din goa je 6 tot 7 joar eerder dood as minsen mit n "normoal" gewicht. As je doar ook nog bie roken, din mouje hailemoal wel zörgen veur n goie begravvenisverzekern want din goa je 13 en n haalf joar eerder dood.

Is der nog hoop din? Nou volgens de aigenoaren van fitnesscentra wel, hor. Dij brengen in jannewoarie alvast extra veul folders rond en dat helpt. De aanmeldens van dattegers en vattegers dij inains deur kriegen dat ze wat aan heur lief doun mouten melden zuch bie bossies aan. Fabrikanten van ofslankpillen en poeders en eetpakketten hebben ook knientjesdoagen. Mor ... volgens de diëtiste mouje gewoon deureten, drij moal per dag mor din tussentieds nait mit de vingers in de snoeppot en ook van de koelkaaste ofblieven. Want ofvalen is volgens heur n mentoal perses.

As je nou gain geduld hebben, mentoal nait aal te staark in joen schounen stoan, mor wel n dikke porremennee hebben, kin je ook nog overwegen om n retourtje Brezilië te nemen. Doar binnen ze noamelk wereldkampioen plastische sjierurgie. Van over de haile wereld kommen dokters noar Brezilië om de kunst of te kieken. Want wait je wat doar t aldernijste is? Ie kinnen t vet wat je op joen lief op heupen teveul hebben votzoegen loaten en din weer in de borsten inspoiten loaten. Nou, is dat nait prachteg? Joen aigen noodboezem veur overstromens. n Beetje in de lippen? Kin ook, gain perbleem. Je kinnen doar ook de spieren in joen gezicht tiedelk verlammen loaten. Din hejje veur n zetje gain last meer van rimpels in de kop en haals. k Wait nait of dat wel zo gezond is, omreden je doarveur inspoten worden mit spul dat moakt wordt uut n bakterie dij de dodelke zaikte botulisme vereurzoakt. Stel dat ze der n beetje teveul van indoun, din bin je zwoar de pineut.

As je wel joen vet ofzoegen loaten willen, mor der nait zo ver veur raizen willen en ook nait op n wachtlieste willen, din haar je as je de kranten goud bieholden haren ogelopen zotterdag terechte kind in Berlien. Doar was de Duutse dokter Johannes Bruck uut protest tegen t gezondhaidsbelaaid van de regeren in t openboar op n plaain vet aan t ofzoegen bie minsen dij doar belangstellen veur haren. n Ofsproak was nait neudeg. Messchain was verdoven ook wel nait neudeg, mit de temperaturen boeten.

Körtom steveg in t vet, steveg in t nijs de ofgelopen tied, volop in d'aandacht. En aal dij dunne strinnen zo as ik din? Doar heur je niks over. Dij kommen nait in t nijs, dij kinnen de helfte van t doamesblad oversloagen. Je zollen der toch zwoar ofgunsteg van worden!

Geesjen Doddema-Heidema



Al eerder:
| 0350 | 0348 | 0346 | 0344 | 0342 | 0340 | 0336 | 0334 | 0327 | 0325 | 0323 | 0321 | 0319 | 0317 | 0315 | 0313 | 0305 | 0303 | 0301 | 0251 | 0249 | 0247 | 0245 | 0244 | 0242 | 0240 | 0238 | 0236 | 0234 | 0226 | 0224 | 0222 | 0220 | 0218 | 0216 | 0214 | 0212 | 0210 | 0208 | 0206 | 0204 | 0202 | 0152 | 0150 | 0148 | 0146 | 0144 |

De Schriefster
Noam: Geesjen Doddema-Heidema
Geboren: 1953
Woont in:
Schrift al: sunds 1991

Ik treed soamen mit mien man op, hai zingt, ik lees aigen grunneger verhoalen en gedichten veur.

Ie zain
Femilie Doddema is goud mit t Grunnegs aan d loop.

Ie ook?
Kiek den even op de openingsbladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.