DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Jonken
 
kinderen

Eltje Doddema.

Column.

n Woord woar je wat mit kennen.
Aal vattiendoage n nije.


Week 0213
Stoan.

Goie dag lu. t Is weer tied veur n nij woord van de weke. Schenk joe n kop kovvie in en goa der bie zitten, zol k zeggen, omreden ie hebben net zoveul van t zitten as van t stoan. Doarom dit moal t woord 'stoan'.

Stoan ie der wel ais bie stil hou vrumd onze toal wezen kin? Je kinnen bieveurbeeld zitten en toch stief stoan van de zenen. Doar heb je last van as je op stoande vout ontsloagen binnen en op de kaaien stoan. Joe stoan din nait meer in de gunst van joen boas en wizze is dat je der din noast stoan. En din zit je mit tonen in d'aaske.

Mor as je zitten wil dat nait zeggen dat je gain stoangeld betoalen huiven. Nee, n stoanploatse kin, ook as je der op t mement zulf nait stoan, geld kosten. En as je din as debiteur in de bouken stoan, kin joe dat duur te stoan kommen. Ie stoan der din vervast nait rooskleureg op. De persoon, bie wel je in t kriet stoan kon din wel ais mit n stoand zaail op joe of kommen. Ie kinnen hom din mor beter nait in de wege stoan. Zeker is dat je der din maal veur stoan. Ie kinnen zulfs op de swaarde lieste te stoan kommen.

Nou kinnen ie op dat mement wel n stoand gezichte trekken, mor je kinnen tegen overstoan van joen schuldaaiser mor beter nait op joen stok stoan blieven. Dij wait vervast wel hou de ontvangsten tegen d'uutgoaven stoan en dij zal zien mannechie doarom wel stoan.

En in wezen stoan ie machteloos, omreden ie hebben gain pode om op te stoan. In t slimste geval mout je terechte stoan en de rechter zal vervast nait mit de mond vol tanden stoan. En of ie nou hoog aanschreven stoan, mit troanen in d'ogen stoan of der bie stoan as n zoltzak, ie zellen der op dat menent allind veur stoan. Net as ik veur t woord van de weke.

Of ik doar ooit n stoande ovoatsie veur krieg? Ach, ik wait nait hou of ie doar tegenover stoan, ik wil doar aigenlieks nait bie stilstoan. Ik wil der wel veur in stoan dat r over vattien doage weer n nij woord van de weke komt.

Tot din. Moi hor.

Eltjes handtaiken

Tot aankommen moal. Moi hor.



Al eerder:
| 0427 | 0425 | 0423 | 0421 | 0419 | 0417 | 0415 | 0413 | 0411 | 0409 | 0407 | 0405 | 0403 | 0401 | 0351 | 0349 | 0347 | 0345 | 0343 | 0341 | 0339 | 0337 | 0335 | 0333 | 0326 | 0324 | 0322 | 0320 | 0318 | 0316 | 0314 | 0312 | 0310 | 0308 | 0306 | 0304 | 0302 | 0252 | 0250 | 0248 | 0246 | 0243 | 0241 | 0239 | 0237 | 0235 | 0225 | 0223 | 0221 | 0219 | 0217 | 0215 | 0213 | 0211 | 0209 | 0207 | 0205 | 0203 | 0201 | 0151 | 0149 | 0147 | 0145 | 0143 | 0141 | 0139 |

De Schriever
Noam: Eltje Doddema
Geboren: 1952
Woont in: Stadsknoal
Schrift al: joaren

Eltje is schoolmeester, zanger, schriever, componist en watnaitaal.
Bie Radio Simone dut hai n program in t Grunnegs.

Ie zain
Hieronder n petret van Eltje as je der op klikken kom je op zien webstee.

Eltje Doddema

Ie nait?
Ie willen joen petret nait op t Internet mor joen verhoaltjes hier wel zain loaten?
Kiek den even op de openingsbladziede en vul t formeliertje in.
Dideldom.comBiewaarkt: 10-05-2007Bezuikers: Grunnegers veur elk.