|
Week 0411
Over.
Binnen ie ook ain van dij lu dij zok in de moalstroom van onze jachtege moatschappij overaarbaaid het? n Male boudel is dat. Lovve t doarom mor ais hebben over t woord 'over'.
En das nait overbodeg, lu. Veul van joe hebben zok vervast bewust of onbewust overleverd aan de drang om nog meer as veul te hebben. Overmoat is din ook t doul in t leven. En om dat te berieken overtreden zok soort lu nogal ais de strekken van n belangriek gezegde, noamelk: overdoad schoadt. Ook al mag je geern over geld en aandere riekdom, is t nait zo dat overbezit naargens goud veur is?
"Mor je kinnen toch nait alles opmoaken en niks overholden," heur k joe zeggen. Wizze. Das dudelk. Ik kin t ook nait over mien lippen verkriegen om dat tegen te spreken. Boetendes wil ik ook nait dat je mie verwieten dat ik roare gezegdes over mie heb. Wat? Ik kin t zulfs nait over mien tonge kriegen. Tuurlek, elk legt wel wat over zied, omreden as je hailendaal niks hebben din wor je doarvan overstuur, nee din?
Ach, wie mouten ale minsen ook nait over ain kamme scheren, nee din? Boetendes mout je joe ook ais n moal over t haart strieken kinnen. as t over geld gaait. En ik wil ook ja nait aal over joe hinzitten.
Nog ain ding. Dou niks haals over kop. Overdink alles goud en kom nait te gaauw over de brogge mit t ain of t aander. Beter n moal over tied as over de toeren. Alhouwel, dat gaait vervast ook wel weer over.
Ik hol der nou over op, lu, mor bedink: of ie nou hier of aan d'overkaande stoan: overaal wordt brood bakt.
Tot aankommen moal. Moi hor.
|
