Eltje Doddema.

In de tied dat de doagen kört binnen en de nachten laank, mouten we veul gebruuk moaken van kunstlicht om n kander recht in d'ogen kieken te kinnen. Vandoar dit moal t woord 'licht'. En omdat dij net zo klinkt as 'ligt' zit dij der ook maank.

Nou ligt t r mor aan of je mekoar t licht in d'ogen gunnen of nait. Dat ligt asmis wel ais slim gevuileg en doarom mout je doar nait te licht over denken. As je mekoar nait liggen, ligt t ter dik boven op dat joe dat veul muite kost. Mor ja, je mouten op zien tied lichten en swoaren kinnen, aans blief je netuurlek naargens.

t Hangt ter mor vanof mit wat veur lu je te moaken hebben. n Oplichter het minder krediet as n lichtgewicht stel ik mie zo veur. En as je joen licht schienen loaten over n lichtmis din gaait joe der vervast al gaauw n licht op.

Zo worden lu wogen en wel of nait te licht bevonden en t moakt nait uut van welke lichten of ze binnen of of ze wel of nait t licht in d'ogen hebben. Zo was t en zo zal t licht aaltied wel blieven ook. En t stoere is: t ligt nait aaltied even dudelk.

Wozzen ie bievubbeld dat mit t licht ook de noageboorte van n kou of n peerd bedould worden kin? Vrouger hongen boeren dat licht boven in n boom omdat ze leufden dat t mit t jonkvee din aal goud kwam. Zo hong e doar bie daglicht en bie moanlicht en as e dreuge was wuir e bruukt veur plaaisters op wonden.

Zo kon zo'n licht licht in de duusternis brengen. Net as joen fietslanteern, as dij teminnend licht geft. Of binnen ie ook zo aine dij voak zunder licht ridt? Ie waiten wel: ain dij verwacht dat n aander joe bielicht in t duustern. Ach, wel ligt doar tegenwoordeg nou ook nog wakker van. Gain aine toch. En t ligt ook nait in de verwachten dat dat ooit gebeuren zal.

Alhouwel, wie mouten doar ook weer nait te lichtzinneg over wezen, omreden der wil toch gain aine n lanteernpoale zunder licht wezen. Ach, en boeren zeden vrouger al: hou lichter laand, hou lozer lu. En zo ligt t nou en zo ligt t ook weer in 2003. Hou t ook ligt: ik wins joe in elks geval veul zegen.

Tot aankommen moal. Moi hor.