Eltje Doddema.

Je maggen tegenwoordeg bliede wezen as je n dokter of n tandarts hebben, omreden der kommen aal voaker berichten over lu dij der zunder zitten. Ik kin mie begriepen dat dij doar glìn van in d'hakken worden. Veuraal as deur gebrek aan n goie gezondhaidszörg ain van joen noasten uut tied komt, de hakken uutstekt dus. Doarom din ook dit moal t woord 'hak'.

Nou is t zo dat, as je n dokter neudeg binnen, je hom mor slecht aan d'hakken kommen kinnen. Stel joe toch ais veur, dat je op n dag last hebben van winterhakken. Nou het dat op zich nait zo hail veul om d'hakken, mor van t ongemak worden ie gek in d'hakken. En din vernemen ie hou antwoordapperoaten en wachtliesten joe der op wiezen dat de heren doktoren de hakken behoorlek lös hebben. Nou ja, ze hebben t natuurlek gloepens drok vanzulf. Ze lopen vervast nait te hakvegen.

Mor goud, t is en t wordt n groot perbleem en wie hebben en kriegen doar hail wat mit te hakholden, te verhakstokken dus. En n dokter goud ofhakkeln het ook gain zin, omreden hai loat joe zo d'hakken zain en din bin je nog wieder van huus. Din kin je netuurlek wel noar d'ain of d'aandere hakkenkrukker goan, mor t liekt mie tou dat je din toch mor beter d'hakken optrekken kinnen. Want as dij hakt valen der vervast spoanders.

Ach, dat kin elk overkommen, nee din? Ie hebben vervast ook wel ais n hakke in t hoar had omdat t wicht van tan Jaantje op schounen mit hoge hakken zo goud knippen kon. En dat hakt ter in, zo veur schaande lopen.

Lestdoags waren de vraauw en ik nuigd bie Okko en Triene. Volgens aigen zeggen kon aan Okko's kookkunsten hom gain aine aan d'hakken kommen. Wie binnen der doarom tot aan d'hakken tou hol van d'honger noar tou reden en noadat heur hakkenbietertje Trixie ons aan t zundoagse goud hongen haar, konden we op blode hakken aanschoeven, omreden t nije karpet mog nait voel worden. Aan wat uut de potten van Okko kwam zat gain hak of smak en wie trokken noa t kweerse lobbege trilpuddinkje din ook gaauw aan d'hakken, op huus aan.

Mor goud, veur dak nog wieder van de hak op de tak spring, joe n hak zet en joe op d'hakke neem, ik hol nou op te hikhakken.

Tot aankommen moal. Moi hor.