Eltje Doddema.

Elk moal as k op n stee kom woar lu om d'ain of d'aandere reden bie nkander west binnen, is t doar noaderhand n grode swieneboudel.
Vandoar dat ik docht: "Wat zol t verband nou wezen tussen swienen en mìnsen." Vandoar dit moal t woord 'swien'.

t Is bekend dat wie mìnsen de grootste swienen binnen dij der op twij poten rondlopen. Kiek mor op de parkeerploatsen langs de snelwegen, in de bozzen of woar je aans ais n moal tot rust kommen willen. Nou wait ik wel dat ie doar nait bieheuren, omreden ie gooien joen swienetroep aaltied in de doarveur bestemde bakken. Joa toch? Nee, mainsttied is t zo, dat d'aandern de swienhonden binnen. En zulf hebben ie vervast ook gain swienekop of hebben ie thuus ook gain swienhoukje. Ie binnen netjes en ie zörgen der ook wel veur dat r bie joe gain swien in t ies komt en ie joagen der vervast ook gainent in.

Ach, ie binnen mit nkander veurbeeldege lu. Alhouwel ie zingen op stoere menenten ook wel ais net as n swien dij ringd wordt, mor over t algemain sloagen ie joe der best deurhìn. Boetendes, n goud swien vret ook ja alles.

Mor toch lu, wees nou ais eerlek. Der binnen vervast wel mementen dat ie zo lòi binnen as n swien. Ook binnen ie, as n aander t nait zugt, wel ais zo roeg as n swien. Joe huiven joe ook ja nait beter veur te doun as dat je binnen. Zeg nou ais zulf: ie willen uut n swien toch ook wel ais twij roggen snieden. En t gaait joe asmis ook wel ais zo as de swienen dij knorrende vet worden?

Kiek. Zo het elk wel wat van de modde of de bere mitkregen, ook al is e nog mor tussen swien en big of hedde swienhoaren op de kop of is e n swienevanger. Nee, van n swien is gain mìns wat vrumds.

Mor gain nood lu. Elk swien het wel n krul in de steert en dat waiten dij swienen in n Hoag ook wel. Ach, en aans ik wel.

Tot aankommen moal. Moi hor.