Eltje Doddema.

Vrouger wuir n huusholden op regel holden deur inwonende ol lu. Tegenwoordeg gaait dat aans. n Nijmoots gezin wordt elektries en digitoal aanstuurd en d'apperoaten dij doarveur zörgen worden aal klaainer en ingewikkelder. Je mouten van de wel slim stoere handlaaidens zowat studie moaken, wil je der wat wies uut worden. Vandoar dit moal t woord 'wies'.

Elk wil netuurlek mit de tied mitgoan, mor ik wies joe der even op dat elke veraandern gain verbetern is. Loat joe doarom ook niks wies moaken deur dij handege rekloamemoakers, omreden van aal dij wiesmoakerij roak je van de wies. Net as t wief mit d'euliekouken dij op heur aigen wies aal ruip van: "ronde dinkjes, ronde dinkjes."

Nou is t netuurlek woar dat je mit sommege dingen vervast wel wies binnen. Dat mag, as wies wezen joen oard mor nait is, omreden lu dij wies binnen mainen t aaltied beter te waiten. Mor as aine wies is mit zokzulf en ook nog wieze proatjes het, kin je t aalmoal wel schudden. Nee, ain dij zo wies is as t schiethuus van Bremen is zo wies dat e wel op n proemstaine draaien kin. Dij is zulfs zo wies dat e t gras wazen heuren kin. Wat zeggen ie? Ie kinnen aine dij de wind waaien zain kin? n Male boudel, lu. Mor t kin slimmer. Geef veuraal acht op lu dij zo wies binnen dat ze zokzulf in de neuze spijen kinnen. Wiesneuzen zeg mor. Nou, das gain wiesmanswaark.

In elks geval staait vast, dat hounder dij wies binnen heur aaier ook wel ais in t roet leggen.. Dij worden din vervast deur schoade en schaande wies. Ach, en as ze eerlek binnen, binnen ze der slim wies mit dat t mit dat wieze gedou oflopen is.

Mor goud. Wiesder op de wiesderploade geft aan dat mien tied weer om is. Veur de lu dij vinden dak weer onwies schreven heb nog ain wieshaid tot slot, zodat ook zai toch nog wat wiesder worden. Doar komt e. d'Olste mout de wieste wezen. Nou, ie willen mie toch nait wies moaken dat dat gain wieze proat is.

Tot aankommen moal. Moi hor.