Geesjen Doddema-Heidema.

Hejje t ook lezen lu?

De plietsie-kommesoares in Amsterdam wil vaar soorten plietsie hebben. De dicht-bie-plietsie, de kontrole-plietsie, de opsporensplietsie en de ordeplietsie. Minsen vuilen zuch nait vaaileg, zegt e. En doarom mot de plietsie zichtboarder worden.

De dichtbie-plietsie, dat binnen din de buurtagenten. Ze treden streng op as t mot, mor ze helpen ook minsen, woar dat neudeg is. De kontrole-plietsie is aanwezeg op de weg, op t wotter, op de rails en in de metro. De opsporens-plietsie is veur de haarde krimenaliteit en ook veur veulplegers, zo as winkeldaiven en stroatrovers. De orde-plietsie mot rellen en ongeregeldheden veurkommen. En as ze din zo dudelk veur de börgers waarken, nemen de onvaaileghaidsgevuilens bie de minsen vanzulf of, zo het de brave man bedocht.

Dit is nou toch n geval van olle wien in nije zakken. Hebben wie nait al n wiek-agent, verkeers-plietsie, recherche en ME? Binnen dit nait gewoon vaar nije noamen veur dezulfde minsen? Ik heb der n haard heufd in, dat der deur dizze fratsen meer blaauw op stroade komt. Eerder minder denk ik, omreden der ook nog n bevel uut-voardegd is, dat de plietsie de lichte kriminaliteit mor gewoon in de loa stoppen en der veuraal gain tied aan besteden mot. Inbroak en winkeldaifstal, tasjesrovers en zukse ainvoudege delikten, doar huiven ze zuch nait meer drok om moaken. Allinneg even mit twij vingers n perses typen, en din onderin buroloa n stee opzuiken onder-aand de bulde: "Nait veur onderzuik in aanmaarken kommende gevallen". Zai hebben allinneg nog tied veur t grode waark.

k Wait nait hou t mit joe is. Ik kin mor ain soort plietsie van dichtbie. En dat is de "as je ze neudeg binnen, zai je ze nait"-plietsie. Kom je soavends twinteg fietsers tegen en rieden der 17 zunder licht. Is der n agent in de buurt? Nee, vanzulf nait. Wil je n verdacht persoon melden dij uut de toene van de buren komt, terwiel je waiten dat ze nait in huus binnen? Kinnen wel bellen, mor as je n bulde geluk hebben krieg je n welwillende agent in Stad veur telefoon. Dij mot joe deurverbinden mit de ploatselke Hermandad, mor ja, dat is nou sneu, de ainegste dainstdounde agent is net vrij. De volgende mörgen mag je weer bellen, op joen aigen kosten vanzulf, en n ofsproak moaken veur t doun van aangifte. Hejje dat vervolgens doan, din wordt dat perses volgens de nije richtlienen onder in de loa legd en mag doar verstovven.

Börgers motten zuch vaaileger vuilen? Der is mor ain kategorie dij zuch vaaileg vuilt, zo as t nou is en dat is de groep lichte krimenelen. Dij waiten nou teminnend zeker dat ze ongesteurd heur gang goan kinnen.