DideldomDe Grunneger vlaageGrunnen's Laidtop
Zuiken op Dideldom:
t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Waiten
 
weten
n Woord zuiken:

Dag van de Grunneger Geschiedenis.

Zotterdag 5 november 2005, 11.00 - 17.00 uur.


In t gebaauw van de Grunneger Archieven, aan t Cascadeplaain in Stad, was zotterdag 5 november 2005 weer de 'Dag van de Grunneger Geschiedenis'.
Mit mitwaarken van: RHC Grunneger Archieven, t Hoes van de Grunneger Kultuur en de Kultuurhistorische Verainen Stad en Lande, t Grunnegs AudioVisueel Archief en Biblionet.

t Themoa dit joar was 'Noabers', t wuir nait allend n dag over mor ook mít ons noabers, Vraislaand, Drint en Ost-Vraislaand.

t Spul begon om elf uur, dou Eddy de Jonge t woord nam en elks van haarten welkom haitte.
Dou brochten Daan Dost en Jaap Kampinga t bekende laid 'De Kiepkerel', schreven in 1949 deur börgmeester Scholtens van Ol Pekel.

Eddy de Jonge Daan Dost en Jaap Kampinga Daan Dost en Jaap Kampinga

Flitslezingen:

Verschillende lezens over de Drintse, Vraize, Grunneger en Ost-Vraize verholdens:
- De historische betrekkens tussen Noord-Nederland en Noordwest-Duutslaand, deur historisch publicist en koamergeleerde drs. Otto Knottnerus.
- Deutsch-Niederländische beziehungen im Ems-Dollardgebiet, deur Arno Ullrichs van t Friesenforum Ost-Friesland.
- De geschiedkundige verholdens tussen Drint en Grunnen, deur drs. Anne Doorenbos, veurzitter van t 'Nei Drèents Geneutschap' en gemaintesiktoares van gemainte Noordenveld.
- 'Dizz' kant Lauwers', n lezen over Vraizen en Grunnegers en de betrekkelkhaid van kulturele verschillen, deur dr. Goffe Jensma, waitenschoppelk onderzuiker van de Fryske Akademy.

Otto Knottnerus Arno Ullrichs Anne Doorenbos Goffe Jensma

Toal stoomkursussen:

- 'Snitterles Drèents', deur Jan Germs, streektoalfunctionoares van Drint.
- 'Bruuskurs Plattduuts', deur Carl-Heinz Dirks, hoofdredacteur van het Ost-Friesische streektoaltiedschrift Diesel.
- 'Brânles Frysk' mit aerobics (huppen en springen), deur Wieke Fennemoa van de Fryske Akademy.

Rondlaaidens:

Vanwegens t sukses van veureg joar wazzen ook dit joar de depots van de Grunneger Archieven opengesteld veur t pebliek. Mitwaarkers van t archief verzörgden spesioale rondlaaidens.

Veurstellens op podium: Laway

- De Ost-Friesischer meziekgroep Laway brocht middelaiwse- en folk-meziek.
- Modeshows mit historische kestuums oet de 18e en 19e aiw deur kestuumgezelschop De Golden Laiw. (Grunneger, Vraize en Drinze klaiderdracht).
- Bekendmoaken winnaar fotowedstried; de fotowedstried was oetschreven in t koader van t themoa 'Noabers'. De beoordailenskemizzie haar de 20 beste foto's oetzöcht.

Pobbekaast:

Spesioal veur t jonkgoud was der n pobbetheoater mit t stuk 'Burengerucht' deur theoater Grimaldi.

Film:

In n spesioal inrichte bioskoopzoal konnen lu de beste films van de archieven van Grunnen, Drint, Vraislaand en Ost-Vraislaand zain.

Historische feguren Historische feguren

Markante historische en legendoarische personages oet de verschillende regio's wuiren oetbeeld deur akteurs dij zuch onder t pebliek mengden. Bezuikers konden mit Rudolf de Mepsche, Opoe Tjadens, Grûtte Pier, Berend Botje, Jan de Roos, Claus Störtebecker en Bartje op petret.

Infermoatsie- en boukenmaart:

Omenbie 50 Historische en Aarfgoudorganisoatsies presentaaierden zuch op de infermoatsiemaart. Op de boukenmaart verkochden omenbie 10 boukhandeloaren bouken over Grunneger literatuur, geschiedenis, aarfgoud en kunst.
Snommerdoags wuir t Historisch Joarbouk 2005, n oetgoave van Verainen Stad & Lande, presentaaierd.

Boukenmaart 1 Boukenmaart 2

Kwis

De dag wuir ofsloten mit n grode geschiedeniskwis, doar t pebliek zien historische kennis testen kon.
De kwis wuir presentaaierd deur Reinder Smith, asmis wuiren de vroagen zongen deur Henk Scholte...
Niemeyer won en kreeg n swoare pries.

Reinder Smith Henk Scholte en Bert Ridderbos 4 Dailnemers 3 Dailnemers Prieswinnoar Niemeyer Prieswinnoar Niemeyer

Om vief uur was t doan.

Dat der nait van meer dingen foto's op dizze bladziede stoan komt omreden ik ken mor op ain stee teglieks weden... en ik mag ook geern even n proatje moaken.

Jacob Nijboer

| Dag van de Grunneger Geschiedenis 2003 | Dag van de Grunneger Geschiedenis 2004 | Dag van de Grunneger Geschiedenis 2005 | Dag van de Grunneger Geschiedenis 2006 | Dag van de Grunneger Geschiedenis 2007 | Dag van de Grunneger Geschiedenis 2008 | Dag van de Grunneger Geschiedenis 2009 | Dag van de Grunneger Geschiedenis 2010 |


Ie wozzen t al?
Dat dut niks, den huifje t nait lezen.

Ie wozzen t nait?
Den kenje joen veurdaail der mit doun.

informoatsie
© 2000 - 2017 Dideldom.comBiewaarkt: 04-01-2016Bezuikers: Grunnegers veur elk.