DideldomDe Grunneger vlaageGrunnen's Laidtop
Zuiken op Dideldom:
t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Meroakel!
 
geweldig!
n Woord zuiken:

Dag van de Grunneger Geschiedenis.

Zotterdag 30 oktober 2004, 11.00 - 17.00 uur.


In t gebaauw van de Grunneger Archieven, aan t Cascadeplaain in Stad, was zotterdag 30 oktober weer de 'Dag van de Grunneger Geschiedenis'.

Mit mitwaarken van: RHC Grunneger Archieven, t Hoes van de Grunneger Kultuur en de Kultuurhistorische Verainen Stad en Lande, ditmoal verstaarkt mit t Grunnegs AudioVisueel Archief.

t Themoa dit joar was 'ter leeringhe ende vermaeck', wat ie tegenkwammen in de verschillende aktiviteiten dij der holden wuirden, zoas lezingen, theoater, films met levende meziek en Grunneger les.

Daarnoast was der n infermoatsie- en boukenmaarkt woar historische veraainens en boukhandeloaren zuk zain luiten. Dit joar wazzen der ook schiere attraksies veur kinder.

Om even over elven wuir de dag open doan deur Henk Scholte, noa hom kwam Ubbo Emmius aan t woord dij zunder al te veul muite n sprong van vaaierhonderd joar in de tied muik.

Meziekgroep Törf zörgde veur schiere (olle) meziek.

Henk Scholte Ubbo Emmius Törf

In n klaslokoal dij n beetje aankled was as in Opoe's tied, mit schoolmeesterzetel en schoolploaten van Cornelis Jetses, huil Eltje Doddema n broeskurzussen Grunnegs. As degelke olderwetse schoolmeester zol hai de wind der goud onder holden was der zegt, mor dat vuil aal tou (of tegen...). Leerlingen hemmen der aaltmoal wel wat van opdoan, veur zowiet as ik t zain heb.

Jan Oldenhuis huil lezens over t onderwies in de 19e aiw, t was kant schier om te heuren hou t der vrouger aan tou gong.

Dirk van der Heide zien lezens gongen over olde ambachten en zegswiezen (mit veurwaarpen), zo konje der achterkommen hou bepoalde zegswiezen ontstoan binnen.

Eltje Doddema Jan Oldenhuis Dirk van der Heide

Aander lezens gongen over H.D. Guyot en t dovenonderwies (in geboarentoal), deur Henk Betten (en n doventolk).

De lezens van Reint Wobbes gongen over 'de geschiedenis van de Maatschappij tot Nut van het Algemeen'.

En wieder was der nog genogt te zain en te heuren.

J.J.A Goeverneur (speuld deur dhr. T. Hofman), alias "Jan de Rijmer" (1798-1889), druig veur oet aigen waark. De Grunneger spotdichter en laidjesschriever brocht onder aandern 'Toen onze mop een mopje was...' en 'In een groen, groen, groen, groen, knolle.. knollenland'.

'Verhoal aan raais', n jeugdveurstellen veur kinder vanof 8 joar. Dhr. E. van Dort en t striekkwartet van de Stichting Vertellus brochten olde Grunneger sprookjes weer tot leven. Veurdat ie t in de goaten hadden zat der n 'Smakhak' bie joe op schoot.

In n spesioal inricht bioscoopzoaltje konnen bezuikers kieken noar n schoolfilm van J. Thie dij over n dag op de veurmoalege jongensschool in de Jacobijnerstraat in stad Grunnen in 1932 gaait. De twijde film "Kermis in Grunnen deur de joaren hén" was n oflevern van t bekende TV-Noord pergram "Vrouger". Bie dizze kompiloatsie van kermisbeelden van de joaren '30 tot de jaren '70 van de veurege aiw. Bie baide films wuir spesioal veur dizze gelegenhaid komponeerde levendemeziek speuld deur Martin Lambeek, bekend van de band Sevenhz, Gert Plas, sleudelbredspeuler van de bands As it Burns en Winter of Sin en O-Cyanic, het dance-ambient project van Yan Ensing.

Meer as twinteg Historische en Aarfgoudorganisoatsies presentaaierden zuk op de infermoatsiemaarkt. Op de boukenmaarkt wazzen bouken over Grunneger literatuur, geschiedenis, aarfgoud en kunst te kriegen.

Boeten op t Cascadeplaain was n hail klaine kermis mit onder aaandern n nostalgische draaimeulen en n povvertjeskroam. En wegens sukses prolongeerd, de Boerderijbus mit Grunneger streekprodukten.

Draaimeulen Povvertjekroam Boerderijwoagen

De Stichten Waddenprodukten zörgde veur n verschaidenhaid aan Grunneger gerechten, dij lu zok goud smoaken luiten.

Als ofsloeter van de dag was der de Grode Grunneger Geschiedeniskwis. t Pebliek kon n formelier mit vroagen over Grunneger geschiedenis invullen, as ze dat goud genogt deden kwammen ze in aanmaarken veur de finoale.

De drij besten streden, onder grode peblieke belangstellen, om de eerste pries, zai wozzen aal drij n bult, mor der was mor ain winnoar.

Pebliek bie kwis De drij finalisten

Om vief uur was t doan.

Der wazzen dizze dag om en bie vieftienhonderd bezuikers.

Jacob Nijboer

| Dag van de Grunneger Geschiedenis 2003 | Dag van de Grunneger Geschiedenis 2004 | Dag van de Grunneger Geschiedenis 2005 | Dag van de Grunneger Geschiedenis 2006 | Dag van de Grunneger Geschiedenis 2007 | Dag van de Grunneger Geschiedenis 2008 | Dag van de Grunneger Geschiedenis 2009 | Dag van de Grunneger Geschiedenis 2010 |


Ie wozzen t al?
Dat dut niks, den huifje t nait lezen.

Ie wozzen t nait?
Den kenje joen veurdaail der mit doun.

informoatsie
© 2000 - 2017 Dideldom.comBiewaarkt: 04-01-2016Bezuikers: Grunnegers veur elk.