![]() | ![]() | ![]() ![]() | t Is mor n noam |
|
Herman de Jong.Verhoal.Jeudje op Venne. In Maimoand denken ollen over de zestig nog wel aains aan de leste wereldoorlog. In Canada zain wie in dei moand oorlogsfilms en documentaries op beeldbuis. Sommige olle soldoaten trekken noar Europa: willlen nog wel ains weer zain woar ze vochten hebben en woar hur kameroaden sneuvelt binnen. Zo docht ik ook eem aan oorlogsjoaren en wat er zo al gebeurde. In 1943 waren alle Jeuden oet Winschoot al verdwenen. Wie stonden bie spoorhekken en zagen dei laange rizzen veiwoagens langzoam veurbie goan. Ik herinner mie dat ik achter de iezeren spieltjes van n klain loekje n spierwit wichter's gezichtje zag. Ik wuifde eem... zai keek mie allennig moar aan. Zo'n moment in joen leven roak je nooit weer kwiet. In 1943 was ik elf joar. Al zeg ik het zulf: ik was n mooi kereltje mit zwaart hoar. Mien bruier was nog zwaarter en doarom har hai de bienoam 'Jeude'. Toun hai noar Ulo school vertrok aarfde ik dei bienoam op school. t Was jeude veur en noa! Moar mien vruundjes in stroat nuimden mie olifantje vanwege mien dikke eerdappelliefke. Mien Pa gruide meer eerappels den gruinte in zien volkstoentje. Eerappels lus ik nou nog groag en dat is mie ook wel aan te zain. Moar het gaait de goie kaant op: noa mien aneurism operoatie bin k 25 pond ofvoalen. Op n dag in 1943 luip ik op Venne dicht bie ons kerk. Moeke har mie op n bodschop stuurt, moar wat veur n bodschop dat wait ik nait meer. Ik was net pastorie van ol domie Berghoes veurbie en k har aal eem loert of ik hom achter de roamen zag. Goud! Onno komt dichterbie en zicht mie doar lopen. Hai scheurt zien grote mond open en roept hail aard: "moi, jeude!" De landwachter gromde mie tou: "dat zel we den wel ains eem zain!" Loop moar mooi veur mie oet noar mien kantoor. Ik kreeg inains n loos idee. "Waorom vroag je dominee Berghoes nait, dei woont hier ja vlak bie." Zover harren de heren nog naait docht. De lange landwachter wur der opoet stuurt en eem loater kwam hai mit ol domie binnen. "Wat is hier aan de hand, wat moet Herman hier!" "Zo, zo, domie," zaalfde de vetzak, "ie kennen dat jong?" "Natuurlijk ken ik die jongen, zijn ouders gaan bij mij naar de kerk, wat willen jullie eigenlijk!" Ik zee hail zachtjes: "ze dochten dat ik n jeude was, domie". Boeten streek e mie eem over t hoar en zuchtte: "wat ist n benauwde wereld, Hermantje". Ik mos mit hom mit noar pasterie en doar kreeg ik n kopke surrogaat thee van mevrouw. Ploatst: © Herman de Jong
|
|
© 2000 - 2022 Dideldom.com | Biewaarkt: 04-07-2020 | Grunnegers veur elk. |