DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Aan t rouer
 
aan het roer

Piet Kupers.

Verhoal.

| | Tanne Marietje | Vot |


Tanne Marietje.

t Speulde zok weer of in dat klaine boerderijtje woar ik opgruid bin in Hoogkerk.
Pa haar n stuk of wat bruiers dij of en tou bie ons kwammen.

Zo ook oom Bernard dij altied oom Bennie nuimt wer.
Hai was ook nait groot, zien vraauw tanne Marietje wel, nait allain groot van postuur mor ook mit mond haar ze nait achteraan stoan, ze kwam van t Zuderdaip zoas ze zulf altied zee, en ze vluikte beter of aarger as mien Pa en veur gain grote kerel benauwd.
Ze begunde de mörgen altied mit drij zolte heerengs, oom Bennie kreeg n bord dikke pap mit drij scheppen sukker, dat was goud veur zien spieren (zij tanne Marietje).

Zo of en tou kwammen ze aanscharreln mit heur baident, en noa kovvie en ain twij drij borreltjes vertrokken ze weer noar Stad, tanne Marietje haar n gloepende hekel aan moezen en rötten en dij waren der wel bie ons in de olle schuren.
In dij tied was ik joar of aachte denk ik.

As tanne Marietje even noar de plee mos, dan mos moeke mit heur mit. Wie haren gain elektries licht op t olle achterdeel mit vaaier koustallen, en dan hailmoal achteraan de plee, mit n klain dakroamke, moeke ston den veur de plee mit schienvat in haand totdat Tanne kloar was.

Mien oldste bruier zat op zeevoartschoul hai leerde veur stuurman, was doarom thoes, hai haar al wat joaren voaren op kustvoart en duurfde hail wat ofzain.
Dij oavend ruip hai mie noar boeten in t stikke duuster, en zee, "Woar is dien Hanska" (een tamme torenkraaie).
Ik zee "Dij zit op t dak denk ik". "Floit hom ains", zei mien bruier Kloas.
Ik dee t en Hanska kwam aanzailen en gong op mien scholder zitten.
Kloas zee "Nou geef ik die n zetje dast in dakgeude komst, en den stopst doe Hanska deur t pleeroamke hén, kinnen wie laggen.
t Leek mie wel wat.

Dou ik dat doan haar gebeuren der hail veul dingen teglieks, tanne Marietje vloog mit roze onderboksem op hakken mien moe ondersteboven schienvat vloog deur de locht, mien bruier was vot, mien pa ropte mie tot dakgeut oet en gaf mie n klets veur mien kont, oom Bennie ston mit mond open in keuken.
Even loater gongen tanne Marietje en oom Bennie op fietse vot en ik mos vot op bèrre.

Dou mien moe nog even bie mie kwam haar ik pas deur wat ik ainglieks doan haar en nam ik mie veur om der nait weer in te trappen wat mien ollere bruiers mie instuupten.
Mor ik ben der wel ains voaker instonken.
t Was de ainigste moal dat ik n klap van mie pa had heb.



| | Tanne Marietje | Vot |

De Schriever
Noam: Piet Kupers
Geboren: 1939 op Kostverloren
Woont in: Stad
Schrift al:

Eevn wat over miezulf, ik ben geboorn in 1939 op Kostverloren, dou ik zes week old was bin Pa en Moe mit twij oldere bruiers en n oldere zuster van mie verhoest noar Hoogkerk aan t Houndaip, doar bin ik opgruit zeg mor, dou ik vattien was bin oluu weer noar Stad goan te wonen, en omdat baide ollere bruiers al op zee wazzen bin ik dat ook doun goan.
Dou ik ainentwinteg was wol ik leren veur stuurman mor Dr. Sterenberg an Hereweg mos mie keuren en dij zee "vergeet dat mor mien jong, hest n oogofwieken, kist wel kok worden". Nou dat wol k nait, gelukkeg kwam ik n laif wichtje tegen en dat is nog mien vraauw.
Ik heb allerlei waark doan, bin begunt bie Lukken in de Poelestroat, sleutels, slötten en rolscheuvels moaken, dou n tiedje bie scheepswarf Kerstholt op maggezien, dou in nachtdainst bie van Gend en Loos, toun vattien joar bie holthandel Stoit an t Houndaip vaaier joar bie groot Zaikenhoes en dou nog ainentwintig joar bie Leon van Gelderschoul as conciërge, en nou bin ik pensionado en vrijwilleger op Noordelk Scheepvaartmuseum, woar ik rondlaidens geef, t voaren en de zee binnen nooit weer oet mien kop west.
De Grunneger toal is mien moudertoal, veul heb ik der nog nait an doan, mor al wel meer as datteg joar moak ik gedichtjes in t Grunnings en heb wel ais n klain optreden doan, en ook wel ains een stukje in t Nijsblad had.

Ie ook?
Ie schrieven ook wel (ais) in t Grunnings en willen joen verhoaltjes hier ook wel zain loaten?
Kiek den even op de openingsbladziede en vul t formeliertje in.
Dideldom.comBiewaarkt: 08-11-2007Bezuikers: Grunnegers veur elk.