DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Tuutjefluiters
 
muziekgroepje van Geert, An en Francien Kuiper

Evert Diekhoes.

Verhoaltje (Plaazerij zegt Evert zulf).

| t Hangt in de gaange... |
| Sikkebok | Nij grasmesien | Snuk | Noar Sodom | Recreatiebiggen |
| Vrouger | Beune | Hamster | Toal | Slikken | Moezen | Computer |
| Sloot | Keuken | Zwoar | Knarrie | Kloas | Haarst | Lezen | Bladvulling |


Moezen.

"Evert", zee Gezinoa, "wie hebben last van moezen".
"Doe meschien, ik nait, ik heb naargens last van", zee ik.
"Ook goud, den heb ik last van moezen, zai vreten aan d tussendeure van t schuure", zee zai.
"Dat zel wel kommen omdat doar hond zien brokken stoan, zai hebben smacht", zee ik.
"Dat ken wel zo wezen, moar ik mag nait lieden dat zai t hoes vervreten, zet mor even n moezevaale, votdoadelk as t even ken, anders blift der bie", komdaaierde ze.
Dat zedde mie aan t denken, wat mos ik doun om dij lutje schietmoeskes n beetje fesounlijk om zaipe te helpen. Zet ik n schuddeltje mit moezegoud, en zai vreten t op, den dreugen zai oet. Gain mooie dood, wat ie. Mit n vaale kriegen zai n petetter achter d oren dij der nait om lugt, noar moeskes formoat gerekent vanzulf, ook nait wat om n leventig wezen aan te doun. Vangen, vermoanend touspreken en boetendeure zetten, dat zol nog t beste wezen, veur moes, en mien gemoudsrust. Mor doar huif ik bie Gezinoa nait mit aankommen, dij zegt den, ainegste goie moes is n dooie moes. Zai is doarin vlintehaard. Noa dat ik mie n tiedje bedocht heb, goa ik noar t schuurtje, en zuik wat materioal bie n kander.
As Gezinoa zok meld mit de boodschap dat koffie kloar is, heb ik mien moezevangtoustel al grotendails kloar. Gezinoa kikt ais noar t fertuut op waarkbaanke, en zegt, "wat mout dat worden".
"Dat is n moezevangtoustel", leg ik oet, "doar ken n moes wel in moar nait weer oet".
"O", zegt ze, "en as dij moes doar den in zit, den kenst hom doodmoaken".
"Joa, dat ken, mor kenst hom ook weer lopen loaten", zeg ik.
"Ainegste goie moes is n dooie moes", zegt zai. (Wat haar ik joe zegt...).
Soavends zet ik mien moezevangtoustel op n stee woar zai der makkelk in kommen kennen, mit stukje keeze d'r in.
Anderdoags zitten der allerdeegs twij moeskes in. Ik roup Gezinoa der bie, "most ains kieken, twije in ain moal". "Nou magst doe ze dood moaken", zeg ik.
Mor dat word heur te gek, "dij lutje moeskes kieken al zo benaauwd", zegt zai, "dij ken ik nait dood moaken".
Ik heb ze vermoanend tousproken, zegt dat zai zok n ander kosthoes opzuiken mossen, en dou weer lopen loaten, boetendeure vanzulf.


| t Hangt in de gaange... |
| Sikkebok | Nij grasmesien | Snuk | Noar Sodom | Recreatiebiggen |
| Vrouger | Beune | Hamster | Toal | Slikken | Moezen | Computer |
| Sloot | Keuken | Zwoar | Knarrie | Kloas | Haarst | Lezen | Bladvulling |


De Schriever
Noam: Evert Diekhoes.
Geboren: 12 april 1938
Woont in: Westerwolde
Schrift al: sunds juli 1997

Evert is begonnen mit zien plaazerij (zo nuimt hai t zulf) op verzuik van n redacteur van n ofdailens-kraantje bie Philips op Knoal.
Doar haaren ze nait genogt nijs om t krantje te vullen.
De eerste dattien van dizze stukjes hebben in t ofdailenskraantje stoan.
Ie ook?
Schrieven ie ook in t Grunnegers, en willen ie joen verhoaltjes hier ook wel op dit webstee zain loaten?
Kiek den ains op de Openings bladziede en vul t formeliertje in.

Gain rekloame?
Nee, mor dat ken nog wel kommen, nait om der geld mit te verdainen, mor om de kosten te drukken.
Dideldom.comBiewaarkt: 04-04-2007Bezuikers: Grunnegers veur elk.