DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Ik bin der stokverlegen mit
 
ik weet niet hoe ik er mee aan moet

Zwaantje Deuntje.

Gedichten.


De Proemen

Boer Begeman was slim vergreld
Op jonges uut zien buurt
Hai har al n moal of wat de hond
Heur achter boksem stuurd

Zai huilen hom wel ais veur de gek
Omdat hai giereg was
n Appel geven aan n kind?
Nee, dat kwam nait te pas

Zoo har hai n boompie in zien toen
Met dikke gele proemen
Ie waiten wel, zulk sappige
Hai mog er geern op roemen

Op n keer dou hai in toene was
Kwam n jonkie, rood en waarm
Op n draf het hek in runnen met
Zien klompen onder d'aarm

Ach Begeman, goa toch gau hen
Joen kaalf dei zit in sloot
Ik heb t zulf zain, k wol visschen doar
Het daaier gait vast dood!

Wat zegst doe jong, mien kaalf in sloot?
Dat is toch vast nait woar?
Hou krieg k dat daaier doar weer uut
Hou krieg k dat veur mekoar?

Din mouten vraauw en knecht moar mit
Dat wordt nog n dik karwaai
Och och, wat he je met n bedrief
Toch altied n boel lawaai

Doe wost bedankt mien jong veur t zeggen
Kom loater moar ais weer
Misschien krigst din n appel heur
Nou heb ik er gain meer

Das goud heur Begeman, zegt jong
Goan ie moar gau noar t laand
Hai draait zuch om en gait weer vot
Moar ... Lacht wat achter d'haand

Dou Begeman met vraauw en knecht
Achter uut noar t laand tou ging
Met wipkoar, touw en n helster d'r op
Dou zag hai doar n roar ding

Het kaalf luip kaalm, körkdreug en schoon
Te vreten doar in t laand
Wel potverdikkie, zee de boer
Wat heb ik nou aan d'haand

Dei lutje oap het mie bedrogen
Woarom het hai dat doan?
Als ik hom krieg, din zel zien broek
Hom nog ais bibbern goan

Zai draaien de wipkoar moar weer om
En goan moar weer aan rais
De boer is niedeg, vraauw kikt zoer
De knecht dei knivvelt ais

Nog n kaamp van huus, zegt boer in ains
Binnen jonges bie ons huus
Op zied van schure in ons toen
Dat is doar vast nait pluus

Nog haarder ging het dou noar huus
De boer wordt rood om kop
Dou hai in toene loater kwam
Har hai n reuzen strop

De jonges waarn nait meer te zain
Waarn laank al uut de wege
Met heur... de proemen van de boer
... Wat was dat doar achter d'hege!!!!!?

Hé Begeman, klinkt n jongesstem
Het t kaalf ook kolde pakt?
Din mout jóm proemen geven heur
Zeln zain, dat t din gau zakt

Wat of boer Begeman dou zee,
Dat is nait te beschrieven
Dat duur k hier nait vertellen heur,
Want k wil groag netjes blieven.

16 augustus 1944

Het Vlinderke

Vlinderke, doe fladderke
Ik zai die elke dag
Hier in ons toentje vlaigen
Doe vroagst nait ains of t mag

Din zitst doe op ain goldjebloum
Of op n vergeetmeniet
Din vlogst weer boven in t vledderbos
Of zitst weer op n margriet

Doe lutje, lutje flodderding
Ik vind die toch zoo mooi
Dien klaidje liekt wel ziede
Bestreut met golden tooi

Als t mooi weer is en zunne schient
Din bist doe doadlijk kloar
Doe doekelst zwierst din deur de lucht
Zuchst doe din gain gevoar?

Vlinderke, doe fladderke
Al is moar kört dien leven
Toch bist doe bliede elke dag
Wat of die t ook mag geven

Al bist doe nog zoo'n lutje ding
Doe hest ons n veurbeeld geven
Om wat het lot ook brengen mag
Steeds opgeruumt te leven

15 aug 1944

Mien gedachten

As ik zoo hier rond om mie tou
Het roeme veld in kiek
Din denk ik voak zoo bie mie zulf
Wat binnen wie toch nog riek.
Wat worden wie deur de natuur
Toch wonder goud bedocht
Wat het t ook nou in dizze tied
Ons toch veul schoons nog brocht

Al binnen de tieden nog zoo stoer,
Al wordt ons t hart soms bang
Natuur dei steurt zich naargens aan
Gait stillegies zien gang
t Moakt alles weer vol fleur en kleur
Het schenkt weer zooveul pracht
Dit alle doagen zoo te zain
Dat geft ons neie kracht

Kiek toch ais even over t veld
Wat is er veul te zain
Ons Voaderland is nou zoo mooi
Al is het ook moar klain
Wees dankboar din veur aal dat moois
Ons schonken met gulle haand
De bede komt din uut ons hart
O God, bewoar ons laand

27 mei 1944

Kinderproat

Janpie zit op Opa's kneie
Het van alles ja te koop
Stelt zoo nou en din ain vroage
En vertelt ook n'haile hoop

Opa, as ik loater groot bin
Goa ik waark'n net as ie
Din verdain ik n'hail boel centjes
Binn' dei allemoal din veur mie?

As ik loalter groot bin Opa
Binn'mien hann'din ook groot
Net as dei van joe nou ook binn
Ook zoo rimp'lig en zoo rood

Heb ik din ook n'snorre Opa
Met zulke punt'n d'r aan op ziet
Heb ik din ook n'boezeroen aan
Zoo as ie, zoo groot en wied?

Opa geft op alles antwoordt
Joa mien jong, joa zeker wis
Moak moar das 't doe groode keerl wost
Net zo as dien Opa (Pabbe) is

Joa moar Opa, as ik groot bin
Krieg 'k din ook zoo'n koale kop?
Want dat heb'm ie ook ja Opa
D'r zit gain hoartje ja meer op

As ik dat din ook krieg Opa
Vertel mie ais, hou of dat kin
Ik heb nou ja zoo veul krull'n
En woar bliev'n dei allmoal din?

Din op ains; 'k wil wel geern groot worn
Mor toch laiver nait zoo old
Want zoo'n koale kop, ... nee Opa
Dat is mie toch veul te kold

April 1944
Geplaatst in Duurswold

Regendag

t Is alles graauw en triestig
Een echte regendag
t Liekt of de waarme zunne
Nou nooit weer schienen mag

De vogeltjes zitten stille
Te huvérn op n tak
Of t koppie ingetrokken
Op t raandje van ons dak

De bloumpies aans zoo geurig
Zo fleureg in heur pracht
Ze stoan nou stil te treuren
Ze missen aal heur kracht

Zoo gait t ook soms oans in t leven
Joa o zoo meunig keer
Denk din, noa n dag van regen
Schient toch de zunne weer.

19 september 1944

Dei Opa toch.

Klain Keeske is moar aal aan t grienen,
t Is net of hai nait aans meer kin.
Zien Moeke vroagt moar aal aan t jonkje
Wat hest mien vint, wat is er din?

Ons Opa is net bie ons west
Hoelst doarom din misschien,
Dat hai weer vot is, lutje jong?
Of hest doe soms wat pien.

Zai nemt de klaine keerl op schoot.
En doekt hom aal moar deur
Moar Keeske snokt en snoffelt moar
En lustert nait noar heur.

Moar end'lijk wordt hai zeker mui,
En wordt din wat bedoart.
Moeke zegt: vertel mie t nou,
Aans wordt dien Moeke kwoad.

Klain Keeske snokt nog even noa
Din zegt dij klaine vint,
Ik heb moar n stuvertje van Opa kregen
En ons Trientje kreeg vief sint.

23 Mei 1944

Ons Slochter

Ons Slochter is nait veul in reken
Het is mor n boeren loug
En t boerenvolk wait aans nait van
As van n peerd en n ploug

Mor dij zoo proat, wait der niks van
Kin ons gemainte slecht
Ons loug is riek, t is zeker woar
Wie holn der van, ... joa echt.

Wel het zoo'n bosch, zoo as wie hebben
En wel het n melkfebriek?
Wel het ain landbouwschoule din
En wel is n "Hooghuus" riek?

Kiek din de mooie börg ais aan
Dij is wel n kiekje weerd
De huusholdschoul is ook nait min
Doar wordt n hail bult leert

Ook ons Gemainte huus is n mooi spul
Zoo as der nait veul binnen
Winkels hebben wie ook genog
Woar je álles kopen kinnen

De dikke Slochtertoren din
dij groode brokke stain
Ons boerderijen en zoo voort
Dij mag toch elk wel zain

En din veuraal ons landerijen
Het bouw- en waidelaand
Deur boer en aarbaider bewaarkt
Met stoere vaste haand

Veuraal in dizze veurjoarstied
Nou alles weer gaait gruien
Het vee weer in de waide lopt
En bomen begunnen te bluien

Is nou ons Slochter din nait mooi?
As je álles goud bekieken?
Binnen wie din te bekloagen soms?
Wie heuren tot de rieken!

Al is ons volk din ook wat stief
Dat is toch vast gain schaande?
De pit is goud lu, leuf dat vast
t Zit mainst aan boeten kaande

Kolham, Laangewiek
1 maai 1944


© Zwaantje Deuntje

De Schriefster
Noam: Zwaantje Deuntje.
Geboren: 1915
Overleden: 1953

Zwaantje Deuntje is mor 38 joar old worden, zai het n haile tied in zo'n tentje achter t hoes legen, ze was hail slim krom, haildaal vergruid.
Zai het, haalfweg veurege aiw, hail veul schreven veur kranten.


Ie ook?
Schrieven ie ook gedichten in t Grunnegs, en willen ie ze hier ook wel ploatsen?
Kiek den ais op de Openings bladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.