Wim Pekelder.

Met veul gepoest en veul gestìn
Worsteln wie ons deur t leven hìn
wie worden al older en slieten ook n beetje
klachten kommen mor dat vergeet je
Langzoam gaait nait meer zoas k wil
Veur d ogen heb k al nije bril
Din nije heup en n klikgebit
Ook t hoar wordt wat gries en wit
k Kin slecht lopen en nait laank stoan
Lege rugpien wil mor nait overgoan
t Ainegste wat wel beter gaait
Is mien vergeetachtighaid
Dokter zegt: "bie t onderzuik noar joen bloud
hebben ze niks vonden, dat is goud
k vertel joe vot mor even
je mouten perbaaiern mit joen piene te leren leven
veur de rest van joen klachten
mouten wie t onderzuik in t zaikenhuus òfwachten.
veur de volgende keer
zug k joe geern over vattien doagen, op t spreekuur weer".

Op t maarktplaain, noast de kerk aan de linkerkaant
Doar ston n hail gezellig restauraant
k Vruig aan d ober doar, willen joe mie wel vertellen
Wat wie hier aal zo kennen bestellen?
Hai zee, alles wat wie hebben staait op koart
t is goud spul, joe kennen mie leuven op mien woord
Dou ons den mor n karbenoadje van t zwien
en doarbie n lekker glaske rooie wien.
t Duurde mor even, toun was t al kloar
De wien was goud, mor t vlaais was nait al te goar
Wie bennen ja nog lang nait zat
k bestel mie nog n bord krentjebrij, dat liekt mie wel wat
Mor bie de eerste hap vuilde k klap in de mond
t krentjebrij sputterde over toavel en op de grond
k haar t hoast nait meer
Mien koezen deden mie vreeselk zeer
n Staintje in t krentjebrij haar dat om maans
Mien gebit haar doar tegen gain enkele kaans
k Begon mie aal meer op te winden
Wie mouten gaauw n koezerieter vinden
Koezerieter was nait groot mor wel staark
Votdoalijk begon hai met zien waark
Hai rommelde wat in mien mond
De sputters vlogen in t rond
k Luit hom stil zien gang mor goan
Mien koeze was toch al noar de moan
Kloar, zee t koezerieter, dat is 20 Euro veur dizze keer
Hopelijk deed t nait al te zeer
k Zee, k zal mien vraauw wel even hoalen
Zai heft t knip en mout veur mie betoalen.
Gelukkig kwam alles toch nog weer goud
In mien mond gain krentjebrij, mor bloud.

In t daip stoef aan de wale,
dreef n haile mooie rooie bale
t kaant op noar Nijwolle ons huus veurbie.
k Zee as t even wil, wordt dij van mie.
k Docht met n haarke in de haand
krieg k hom wel aan de kaant.
Mor ja, k was weer veuls te snel
Nou en den wait je t wel.
Op t staiger haar n aind zien behuifte doan
En doar ging k met de klompen op stoan
k Glee uut, en met n grode boog
met baide bainen omhoog
Smakte ik t kolle wotter in
Aan d bale dinken haar k toun hailemoal gin zin
Wat n maal gevuil, harregat
k Was tot aan mien haals tou nat
De vraauw kwam der ook nog overtou
Zai zee, wat dus t doe doar nou
Kom doar uut, liekst wel nait wies
t wotter is ja zo kold as ies
k Zee loat mie mien gang mor goan
k ken hier gelukkig nog net stoan.
Met veul muite ben k weer de wale op kropen
zodat alles toch weer goud is oflopen.

Op t zied van t huus von k lest n waalze boone
Hai was sikkom zo groot as noagel van mien dikke toone
In n bloumpot op bozzum heb k hom poot
k Docht as k hom wotter geef wordt hai vanzulf wel groot
Noa n poar doage was der nog niks te zain
Dat zette mie aiglieks op t verkeerde bain
Nog meer wotter heb k hom geven
Misschain kwam hai zowel tot leven
Noa n weke haar k t nait meer
Grond in bloumpot ging wat hinneweer
k Haar de stried nait verloren
Weer was der n waalze boone geboren

Al n poar doage
haar k slim last van de moage
k ben der mit noar t dokter west
want aldeur liefzere is nait te best
dokter vruig, hebben joe misschain stamppot had
want din kriegen je dat
t beste wat k joe roaden mag
is hunnig, laifst twij lepels per dag
den mouten de klachten overgoan
en noar n weke maggen je de hunnig wel weer loaten stoan
stamppot eten is wel goud en gezond
mor d ogen hebben voak meer honger dan de mond
den roaken de daarms wat van streek
dat duurt zowat n dikke week
dokter haar t hailemoal bie t rechte end
k haar gain pien meer en ook gain last van wind.

s Mörgens vroug, t was nog graauw
wui k wakker mokt deur de vraauw
zai zee, heurst doe ook dat lewaai
t is gain doef en ook gain kraai
veurzichtg keken wie deur t roam
en zagen door n hail grode vogel stoan
achter op ons kanostaiger
ston hail allain n grode graue raiger
t baist wis zich gain road
want om zien poten haar hai n stok stiekeldroad
k wol hom lokken met n stuk beschuut
mor hai luit zich nait verlaiden, dij guut
k zee tegen de vraauw, goa toch wat op ziet
as raiger die pikt bis t n oge kwiet
k docht dat gaait lang nait goud
en met mien allerleste moud
haar k hom inains bie de poten
k docht k loat hom nait weer lopen
met veul gepoest en gestin
kregen wie t baist weer overhén
hai bleef zitten woar dat hai zat
toun haren wie t toch wel hailemoal had
k docht k goa eerst tot tiene tellen
en den goa k de daaiernzaikenauto bellen
mor dat was nait neudeg meer
hai dee zien vleugels wat hindeweer
en doar vloog hai deur de lucht
en met n haile grode zucht
ben k weer noar t huus in goan
woar Gien, de vraauw, de kovvie al kloar haar stoan.

Nijwolle oktober 2010

Eerste Kaarstdag, t was nait slim waarm,
Kwam der n vraauw aan met n kind op aarm.
Zai zee: Ik zai dat joe hier wonen,
Mag k bie joe misschain mien kind wel verschonen?
Zai kwam hier dudlek nait vandoan
K kon heur mor zuneg verstoan.
Wie keken heur aan met aal ons verstaand
En vruigen, woar kommen joe vot, uut wat veur laand.
Zai zee: k kwait nait wat t er is gebeurd,
Mor mien man het zien paspoort verscheurd
Ons laand krigt aaldeur n aander noam
Doarom bin wie der votgoan
K zee tegen Gien: t Is kold en al loat
Zo n vraauw sturen je toch nait op stroat
T verschonen en hemmeln van t kind
Was n floitje van n sìnt
De vrumde vraauw nam t kind op schoot
En muik heur baide borsten bloot
T kind haar honger, dat konden we wel zain
Heur nou vot te sturen, dat was gemain
K zee : Joe maggen hier wel sloapen dizze nacht,
Den kennen joe mórn verder met nije kracht
Van dankboarhaid begon ze te reren,
K zee, stil mor dat doun wie geern,
De volgede mörn is zai heul vroug votgoan
Mor op t bozzem zagen wie n braifke stoan
Op t braifke haar ze schreven:
Bedankt veur alles, al was t ook mor veur even.