Nije Teneelstukken in t Grunnegers.

Wat nait veul mensen waiten, mor Johan Ruiter het hail laank teneel speult in Oosterhoge brug, mor ook in Wildervank en Gaiten.

Nou speulen, dot e nait meer, mor hai het zuk nou op t schrieven stört en der bennen al vaaier teneelstukken oet zien kompjoetertje rolt.

Hai het ze in t Grunnegs schreven en doarnoa vertoalt in t ABN. Ze worden apmoal oetgeven deur Vink in Alkmaar, dat wil zeggen op aine noa, dei wordt bie t Grunneger Genootschop oetgeven in Scheemde.
t Bennen twei bliedspeulen en twei kluchten.

Wieder is e op dit moment bezig met n ainakter en dei is sikkom kloar.

Der binnen weer twij nije teneelstukken uutgeven deur teneelschriever Gerard Lunshof.
Noadat e joaren stilstoan het met het schrieven van teneelstukken is ain van onse wainege teneelschrievers in Grunnegers weer aan schrieven sloagen.
Al kwam der ondertussen nog wel n jubileum stuk, schreven veur teneelverainen Foxhol uut.
Twij nije teneelstukken binnen der dizze summer van hom uut kommen. "As t om senten gait" en "Ain van rommel maarkt".

Stukken binnen zo schreven, noa aanvroag van n bulde teneelverainens: Nait te olderwest, mor nijmoots. Nait te laank. Drij keer 35 menuten. En nait te veul personen. Drij heren en drij doames.
Wel binnen stukken zo schreven dat der n bulde spel te zain is. Stukken goan nait over de boerenmaid dij traauwen gait mit de zeun van de dörps dokter, mor hail aander spektoakel.

Gerard zien eerste teneelstukken stammen uut de joaren 1988, 1989, en binnen dou uutgeven bie Mulder aan t Zuuderdaip.
Dou is t n haile zet stil west. Wel schreef e in tussen tied veur n kraande zien IJsbrand Spiekstroa verhoalen. Schreef 150 heurspeulen veur n lokoal radio station, Radio Compagnie (Radio Komnij) uut Hogezaand. En presenteerde hai doar 14 joar laank zien streektoal programma. Nou is e dus terugge mit teneel.

Zien stukken binnen op te vroagen onder www.toneeluitgeverijvink.nl. Din reportoire zuiken en din kieken onder auteurs Gerard Lunshof. k Wins joe n bulde plesaaier mit de teneelstukken van Gerard Lunshof.