DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Stuutsiekoor
 
geribd manchester stof, corduroy

Jan Prijt.

Gedichten.


Mien toentje

Wat ains zo mooi leek is nou aan flarden goan
k Was der zo wies mit, mor aal dat moois is doan
Van begun of aan heb ik noar dat wonder keken
Zelfs het Keukenhof was doar niks bie vergeleken.

De haile toene stond vol mit pracht en proal
En als ik nou kiek is het hailemoal koal
De eerdapplels, bonen, siepels en ook rode baiten werden rud
De toene mout rust hebben, dij gaait een haalf joar in de vut.

Mor ale tegensloagen in t leven mouten wie verwaarken
En dat zel de mens oeteindelijk ook doun staarken
Volgend veurjoar kin ik weer wat nijs goan poten
En ik kin joe garanderen, het gewas wordt mit laifde begoten.

Respekt

Wie holden de olle gebroeken in ere
Wie doun de dingen zoals t ons is leerd
Aan weuremoakers besteden wie gain tied
En dat is volgens mie nait verkeerd.

Wie groeten de mensen dij ons willen zain
Dat binnen der vandoag de dag wel wat minder
Mor blief in dien doun en loaten altied die zulf
Zo dast mit tröts kinst zeggen: ik bin der.

Wie holden bepoalde tredities in ere
Wie nemen veur elk wat tied
As ze vroagen om wat suker of een schere
Den leggen wie ons waark even aan zied.

Zwoare last

Pienlijk huift het nait te wezen
As t gewoon zegst wat der is
Gewoon de dingen bespreken
En mit schoamte is niks mis

De mens verzwicht teveul
Dat hebben we voak maarkt
En as ze t verteld hebben
Vuilen ze zoch staarkt

d Er vaalt een bakstaine van mie of
Dat is voak wat wie den heuren
Mor mit gewoon de woarhaid vertellen
Kin die toch niks gebeuren?

Pienlijk huift het nait te wezen
Nee, tis eerder intersant
Om aan t enne te maarken
Wel wint: de last of t verstand.

As ik zo even om mie tou kiek

As ik zo even om mie tou kiek
En elk vlottert zo bie mie langs
Denk dink ik wel ains
De mensen geven mekoar ook gain kans
Wie binnen hier mor een zetje
Mor sommigen dinken dat ze onstaarfelk binnen
Mor als t der op aan komt
Kinst mit dat soort lu gain oorlog winnen.

Hond in de pot

Moeke stond te wachten in deure, want wie mossen eten
En zoas zo voak waren wie de tied weer vergeten
Mit wat kameroadjes aan t speulen vergaten wie de tied
En doarmit was ons moeke nait zo blied
Bie thoeskomst keken wie nogal smachteg oet
Ons hond was stief zat en wie wuiren mit n lege pot begroet
Veur straf op berre en dat zunder eten
Joa lu, dij tied zel ik noeit weer vergeten
Vandoag de dag worden de kinder ook boetenhoes zat
Als ze trek hebben kopen ze zok n puut petat
De jeugd wordt grootbrocht in tieden van overdoad
Mor ik bin vandoag de dag veur het eten noeit meer te loat.

Mollen

In mien grasveld zitten aal bulten en koelen
d Er is aine west dij doarin het legen te woelen
d Er is gainaine dij mie kon vertellen wel dat het doan
En aigenlieks bin ik doar ook wel n beetje mit begoan.

Ik hol mien toentje altied schier, dat is mie leerd
En als ik den achterom kiek denk ik: dat is nait verkeerd
Mor elke keer opnij het der weer aine in zeten te woelen
En weer tref ik aan, hail veul bulten en koelen.

k Heb al n moal de wacht holden mit n schuppe in haand
Mor als ik even nait keek lag der weer n bult, aander kaant
Op een gegeven moment zag ik de doader: tja je mouten der van holden
Mor ik bin eerlijk en zeg: k heb n hekel aan dij verrekte mollen.

d Er is wat mis Vörk

De haile dag loop ik al met zo'n gevuil; d er is wat is
Mor wat ik ook perbaaier, k wait nait wat t is
k Heb nog even op de scheurkelender keken
En miezulf ook nog even in de spaigel bekeken.

Wat ik ook dou of wat ik ook loat
k Heb d er ook ook nog even mit mien vraauw over proat
Ze keek mie aan en schudde wat mit de kop
Pak dien oranje vörke mor en eet dien stampot op.

Mieghummels

Wat ik ook dou, ik kin doar nait best tegen
En elke dag opnij mout in aan t vegen
k Heb de stroate net weer schier of het begunt al weer
Rondom t hoes lopen de mieghummels aal hín en weer.

De aine vertelt mie dit en weer n aander dat
Mor de mieghummels blieven mor lopen noar zo'n klaain gat
k Heb ook al n bordje ploatst dij verwist noar de buren
Want doar hebben ze hail veul ruumte rond de grote schuren.

Kokend wôtter op t gat is mie ook al aanroaden
Mor k heb het idee dat de mieghummels doar in liggen te zunneboaden
n Olle resept oet mien Opoe heur tied levert ook gain resultoat
En bie aal dij rötzooi woar ze mit adverteren is mor aine geboat.

Wie mouten ons mor troosten mit t leven in de netuur
Want aal dij middeltjes helpen nait en binnen ook nog duur
Ain ding staait vast heur ik mien voader nog zeggen
Wast ook dust: de mieghummels blieven aaier leggen.

Ik zai die mörn wel weer

Ik laip wat te dwoalen op een goie mörn
Ik wos aigenlieks nait wat het programma was veur vandoage
Binnen mor deurlopen deur ale stroaten van Hörn
Kwam een bekende tegen dij haar een stôk in de kroage.

Het leven lopt soms roar en doar kinst zulf nait bepoalen
Kinst wel stoer doun en dinken: ze kinnen mie wat
Mor de reken most op t enne zulf betoalen
Op het léste docht ik bie mie zulf, ik heb het hier wel had.

De klompen aan en de plof oet de schure pakt
d Er zat genog benzine in dus ik huif vot nait tenken.
Ik kon overal haard rieden want kwamst vrouger nait veul tegen.
Mor noa een zetje begon ik weer aan dij mooie Hörn te dinken.

Ik bin mor omdraaid aargens op een polderweg.
Ik gaf weer gas en reed weer noar Hörn trôgge.
Mor noa een zetje huil de plof op en haar ik pech.
Noa een spannend oaventuur haar ik toch een mooi rit achter de rôgge.

Lopens noar hoes en dat was nog n hail enne vot.
Ik dochde bie miezulf, dat overkomt mie gain twaide keer.
k Heb de plof weer in de schure zet.
Ik zai die mörn wel weer
Swien in t hok

t Was op een donkere nacht in het mooie dörpke Hörn
Bie aine brandde nog licht en dij zat in spanning te wachten op mörn
De mainste lu waren in hoes en gingen op berre liggen
Zien swien was oettelt en dij mos aanderdoags biggen.

t Was destieds hail gewoon zo'n swientje in t hok
Mor mit t vouern haren de lu het hail aarg drok
Der mos wat aan de wieme kommen en noatuurlijk een dik stok spek
Als wie dat noe aan de knuppels vertellen zeggen ze: doe bist gek.

Boeten werd der mainstied slacht en t haite wôtter ston kloar
Zo mor aan de weg goan slachten leek toch wel n beetje roar
Het swien werd eerst deur de kop schoten mit n schaarpe pinne
En den kwam der even n meske in t swien, net onder de kinne.

Het swien kwam noa t slachten eerst aan de ledder in de gaange
En als wie der snachts of mozzen den werd wie van dij aanblik baange
Het mainste werd verwaarkt tot worsten en schenken
Mor de jonge lu vandoag de dag mouten doar nait aan dinken.

De Winschoter kraante werd der onder legt, aans werd de gaange nat
Als t doar noe aan trôgge dinkst zelst zeggen: dat was ook wat
De tied vlogt der vandoag de dag mit n gang vandeur
En als wie noar t nijs luustern is het ain en aal gezeur.

Wie mekkern aaldoage over van alles en nog wat om ons tou
Mor ja, mit aal dij problemen in de wereld is t ook n hail gedou
Wie mouken ons vrouger over t wereldse gebeuren minder drok
Nee, wie waren al laank tevreden mit n swien in t hok.

Dou dien aigen ding

Dou gewoon dien aigen ding, dat is altied goud
Het begun is moeilijk, mor op een gegeven mement krigst moud
Perbaaier gewoon datgene woar dast vertrouwen in hest
En ast ainmoal aan de gang bist, vuilst die hail best
Het binnen voak de aandern dij dinken: dat lukt hom nait
Mor ast deur zetst lukt het die mit zekerhaid
Wees trots op diezulf, want van n aander zelst dat nait heuren
Zet gewoon deur, want het mout toch vanoet diezulf gebeuren
Kais veur dien aigen toukomst en ik durf te wedden
Dast noa n zetje dinkst: ik kin miezulf wel redden

t Mooiste koamertje

Het onderwaarp wordt nooit besproken
Misschien komt t wel deur de geur
Mor als het den weer zo wiet is
Den verstopt elk zuch even achter de deur.

Vroug of loat en dat geldt veur elk en ain
Den wordt het toch wel neudeg tied
En als drang achter de rogge is
Den is elk toch ook wel weer blied.

Het was den ook n mooi plekje
Woar je even rusteg noa konnen dinken
Vandoag de dag gaait alles hail snel
Mor mos t er wel aandacht aan schenken.

Vrouger gingen wie der rusteg bie zitten
Even tied om de kraante te lezen
Als het even te laank duurde
Den kon de volgende doar hoast nait wezen.

Als ik even in t koamertje haar zeten
En doar mien boodschap had doan
Den keek ik voak even achterom
En den vuilde ik mie gehail voldoan.

Noatied goud aandacht aan de hygiëne
Zodat de resten t hemd nait roakt
En als ik t resultoat nog n moal bekeek
Den zee ik: k heb mie hier goud vermoakt.

Mien boas ston op n gegeven mement veur deure
Hai kon mien rustmoment nait waarderen
Ik schonk hom de aanblik en zee
Hier kinnen ie vast wel wat van leren.

Dat was het den beste lu
n Proatje over het mooiste koamertje in hoes
En als wie hail eerlijk binnen
Den vuilen wie ons doar aalmoal thoes.

Hörn

Van Moushörn tot aan Beesterhoogen
Van Oaksternust tot aan Hörn
t Was n haile gezellige boudel doar
t Was ook wel n tied van zörgen

Het dörpke ontstond zo in de loop van de tied
Beschaarmd tegen t wotter achter de Schankersdiek
d Er was vrouger veul stried om het bestoan
Het ging altied om t verschil tussen aarm en riek

De arbeiders mos n haard waarken
t Haile joar deur hail veul geknooi
En als de laange weke achter rogge was
Leek de inhold van t puutje meer op n fooi

d Er kwam n destieds hail veul koopluu
Mit veul gebulk laip n ze deur de stroaten
d Er werd mit van alles en nog wat vent
Van stoete, appels, vis, tot aan genoaten

Wie heb n vrouger nog lezen leert
Mit n letterbord van aap, noot, mies
Mor als t doar vandoage mit aankomst
Zeggen de kleinkinder, doe bist nait wies

Schreven werd der eerst mit n griffel of mit kriet
Loater broekende wie inkt mit n penne
En als wie dat nait netjes deden
Kwam aan t strafwaark van meester Rose gain enne

In de joar n viefteg, ik wait dat nog goud
d Er woonden veul gezinnen aan de elke loane
Wie dronken destieds nog woater oet n regenbakke
En zo mor op n dag kwam t wotter oet de kroane

Ze konnen ook wel feestvieren
Doar vrouger in d olle Hörn
En als het goud gezelleg was
Ging het deur tot in de vrouge mörn

Joa, Hörn was n hail gezelleg dörpke
Veur elk was der wel wat te beleven
En als der s zummers kermis was
Laiten wie ons over t schoulplein hin zweven

s Aanderdoags was het weer vroug op
Veul luu dij hebben het waiten
d Er mos weer flink arbaid worden
Bie t plougen en dörsen was het den goud zwaiten

t Schoulplein was n trefpunt veur elk en ain
De boeren binnen het vast nog nait vergeten
En als wie den Ol en Nij gingen vieren
Mossen ze in t neije joar alles weer trogge slepen

De carbitbussen muiken hail veul kaboal
En soms kregen we t mit de plietsie aan de stok
Om twaalf uur nammen we ofscheid van t olle joar
En laipen deur alle stroaten mit n welterblok

Strenge winters hebben we kend
De hoezen waren den ook hail aarg kold
En als de aaierkolen of briketten op waren
Den kwam d er in de kachel mor wat holt

Bie wintertied werd der volop scheuvelt
Mainstied bie n boer op n graachte
Wie wozzen nait gaauw van opholden
En gingen wel tot n uur of aachte

s Winters laipen we mainstied op klompen
En als het nat was druigen wie stevels
Bie t scholtje trappen werden we hail voak nat
Wie waren den ook n poar dikke vlegels

De kolle vouten werden waarmt bie de kachel
De natte sokken hongen over de raante
En als dij aanderdoags nait dreuge waren
Den kwam in de klompen wat stro of n kraante

Zwemmen werd leert in Boeskooldaip
Wie sprong zo in t wotter vanoaf de brogge
En als wie den goud ofkould waren
Ging wie mit n hail koppeltje lopens weer trogge

Wie luipen vrouger hail voak in t binnenlaand
Doar woonde ainzoam Epko Vroom
Mor intussen is hai ook verdwenen
Doar staait noe niks meer, zelfs gain boom

In zikkom elke stroate was wel n winkel
En wie konnen der van alles kopen
Als t noe wat boodschappen neudeg hest
Most hail noar Schanze lopen

Vandoag de dag mout alles snel
De mìnsen heb n gain geduld
Vrouger waren ze al tevree
Als de moage mor op tied werd vuld

Woar t vrouger n gezellege drokte was
Doar vindst noe lege stroaten
En alst noe deur Hörn hin lopst
Is het sikkom aal leeg en verloaten

In Hörn stoan nou nog wat hoeskes
En aal meer lege boerderijen
En als t doar vandoag de dag wat tegen komst
Den bist hoogoet mit zie n twijen

Woar vrouger d olle schoule stond
Doar vuilde mennegain zich thoes
En als der noe wat te feestvieren valt
Goan de Hörnsters noar t Zielkerhoes

Woar de kinder in de stroate speulende
Want computers waren der nait
Doar komst noe gainent meer tegen
En dat dut toch wel verdrait

Der binnen gain woorden veur

Der binnen gain woorden veur n zaike
van wel je waiten, dij redt het nait
Streelst de waange, kikst in de ogen
En bist bevangen deur verdrait
Toch bist dankboar veur t énne
dat noa zoveul moudeg strieden kwam
Omdat het nait allaain het leven
moar ook het lieden overnam


De Schriever
Noam: Jan Prijt
Geboren: 2 juli 1946 in Nijbeerte
Woont in: Heiligerlee
Schrift al:

Ik heb ongeveer vatteg joar als ambtenoar waarkt bie de gemainte Beerte en Scheemde. De leste 25 joar als direkteur van socioale zoaken.
Zo'n 35 joar leden bin ik begonnen mit t schrieven van kórte verhoaltjes in het verainsbladje van de voetbalclub en van een aantal gymnastiekverainens. Doarnoast heb ik regelmoateg verhoalen schreven veur de gemaintelijk informoatie kraante (het 7-blad) dij moandelijks verscheen. Dij verhoalen schreef ik destieds in het Nederlands onder een speudoniem (Drs. Zesje).
Ik schrief ook al hail wat joaren in het Grunnegs. Het is begonnen mit gedichtjes veur verjoardoagen in het Nederlands, mor ik vond dat t aigenlieks in het Grunnegs mos. Doar bin ik den ook zo'n 25 joar leden mor mit begonnen. Het binnen mainst gedichies over de persoon en over dingen dij wie doagelijks beleven, woar ik een aigen draai aan geven heb. Doarnoast heb ik körtleden ook hail wat verhoaltjes in het Grunnegs schreven over mien jeugdtied in Nijbeerte. Als lu dat interesseerd den wil ik dij verhoalen ook wel insturen.
Mien Grunneger schrieftoal komt nait hailemoal overain mit het Grunnegers zoals wie dat lezen van bekende Grunneger schrievers. Ik schrief het Grunnegers hoofdzoakelijk in de toal dij wie hier in het Oldambt broeken.
Ie ook?
Ie schrieven ook gedichten in t Grunnegs en willen dij hier ook wel zain loaten?
Kiek den even op de openingsbladziede en vul t formeliertje in.

© 2000 - 2018 Dideldom.comBiewaarkt: 08-01-2018 - Grunnegers veur elk.