DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Kloar
 
helder, duidelijk

Hans Boels.

Gedichten.


Waineg - veul

t Kost nait zoveul om n glimlach te geven,
Of n haand op te steken veur n vrundelke grout,
zukswat ken de zunne schienen loaten,
in t haart van n mins dij t zo neudeg hebben mout.

t Kost nait zo hailveul om n haand op te steken,
Om de aander n klain beetje te dainen.
n Dankboare blik is voak de belonen.
Al was de muite veur die ook mor n klainen.

t Kost nait zo hailveul om dien haart wat lös te loaten,
Veur de minsen om die tou, in zien vreugd én verdrait.
Wees bliede dast zukswat doun kenst veur n aander,
Of is dij aander dien noaste soms nait?

t Kost toch mor zo'n hail klain beetje, dien aarm om n scholder,
Of allain mor n zaachte druk van dien haand.
t Is voak veur dij aander, of hai hail even,
In n klain stukje parredies is belaand.

t Kost toch mor zo waineg om n aander te geven,
Wat, dast doe zulf zo hail groag ontvangst,
laifde! Allain mor om dat weg te geven,
Krigst doe weerom meer ast verlangst..

Om dij vrundelke glimlach, dat even grouten,
Dij aarm om dij scholder, dij hulp dijst doe bootst,
t Kost allemoal mit mekoar mor zo waineg.
Mor in wezen is t allemoal zo ontzaggelk groot.

Moekes toal

Oans Grunneger toal
gain toal...? och kom
ie mainen t klinkt voak
plat en dom?
De toal dij k
van mien moeke leerde
is veur mie
van veul meer weerde
as t Hollands...
joa, k wait wel,
dat mout je kinnen,
mor t Grunnegs
vindt zien oorsprong binnen...
t komt regelrecht oet t haart
en klinkt t meschain
ais roeg en haard,
dat is allaaind de
boetenkaant...
mor vlak onder roege
haarde raand
klink t as meziek
joa, as n laid...
n hail bult minsen
heuren t nait,
dij schoamen zok
veur aigen toal...
Gain toal... ? Och kom !
al klinkt t ook ais
wat plat en dom,
ik leerde t van mien moeke
en dij weer van heur
en zo ging dat mischain
wel aiwen deur !
Oans toal
het veur oans
n hail bult weerde,
want t is de toal
dij elke Grunniger
van zien moeke leerde...


De Schriever
Noam: Hans Boels
Geboren: 27 feb 1932 in Muzzel
Woont in: Muzzelknoal
Schrift al:



Ie ook?
Ie schrieven ook gedichten in t Grunnegs en willen dij hier ook wel zain loaten?
Kiek den even op de openingsbladziede en vul t formeliertje in.
Dideldom.comBiewaarkt: 13-06-2008Bezuikers: Grunnegers veur elk.