DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Bèlken
 
schreeuwen, hard roepen

Haarm Verwey.

Gedicht.


Op t knoal

De winterlucht is geel en graauw
op t Knoal lopt Hendrik met zien vraauw.
Zai lopen recht, nait schaif of schroat
en aal moar langs dij lieke stroat.
t Woater swaart, de wind is schroal
links lopt zai en rechts lopt t knoal.

Van Troapel tot aan Bunermond
t is alles recht en nooit es rond.
Sloot of daip of knoal of wieke,
almoal hebben ze dat lieke.
Plat is t laand en plat ons toal,
links lopt zai en rechts lopt t knoal.

Fladen meziek van d'winkelweek
verwaaien in de lange streek.
mallemeulens, bellen, toeters,
euliekouken, autoskoeters.
Joa, t is prachteg allemoal,
moar links lopt zai en rechts lopt t knoal.

Doar kreeg e nog zowat weer sjans,
moar t vraauwtje geft hom nait veul kans.
n Vieze wind strikt over t laand
zai gript zien eelterege haand.
Over de badde, langs t gemoal,
links lopt zai en rechts lopt t knoal.

Hai lopt allain bie strenge vorst.
De piene trekt hom deur de borst.
Op zes vout is de grond nog zacht,
asof t op t nije veujoar wacht.
Hai lopt wat krom, zien kop is koal
want links luip zai en rechts lopt t knoal.



De Schriever
Noam: Haarm Verwey
Geboren: 12 meert 1942
Woont op: t Knoal
Schrift al:

Ik kom oet t Overdiek, bie Zelng en ik bin timmerman. Zo aalgedureg krieg ik de kriebel in de kont. Toun ik 25 joar wer, was t hail slim en ik emigreerde noar Zuud-Oafrikoa. Doar hep k 18 joar touholn. Ik bin d'r allain hin goan en met vaar man terugge kommen. Toun ik weer in Nederland was luip mie de kop over van emoties en gevuilens en ik schreef n bouk mit körde verhoalen. Dij wör oetgeven en toun kwam der nog n twijde: (ook in n vrumde toal) "Leven in de Bouwerij." (zunder r)
Toun heb ik nog n roman schreven. Och kerel, dat is mooi waark zo'n roman. Titel is: "Verzoening aan de Limpopo." Hai ging d'r in as kauke, baide bouken binnen oetgeven bie Tandem Felix.

Ie ook?
Ie schrieven ook gedichten in t Grunnegs en willen dij hier ook wel zain loaten?
Kiek den even op de openingsbladziede en vul t formeliertje in.
Dideldom.comBiewaarkt: 04-04-2007Bezuikers: Grunnegers veur elk.