Giny Luth.

Gedicht.

Leutje wicht

Op heur berre ligt mien leutje wicht
stief in dreumenlaand.
In de nacht, in t schemerlicht,
striek ik zaacht heur haand.

Dreum mor laiverd, zunder zörgen,
mamme hold van die het mainst,
wil vandoage en ook mörgen,
alles geven wast doe verdainst.

Grui mor op mien lutje wupsteert,
speul en blief nog even klain.
Wat de wereld die dommit leert,
huifst doe nou nog nait te zain.

k Wil vandoage nog groag vasthollen,
t keudeldoemke dast nou bist,
doarvan stilaan nog even grollen,
tot de tied dat ook oetwist.

Want de weken dij worren joaren,
vlaigen veurbie in stilleghaid.
Miemeroaties ken k bewoaren,
mor dien jonkhaid schaande nait.

Mit dit gedicht de Giny mit aan de de Grunneger Schriefwedstried van gemainte Vlagtwedde in 2006, t het gain pries wonnen, mor is wel ploatst in t boukje van de schriefwedstried.

De Schriefster

Noam: Giny Luth
Geboren: 1959
Woont in: Vlagtwedde
Schrift al: nog mor n poar joar in t Grunnegs

Ik heb joaren bie de plietsie in Vraislaand en Grunnen waarkt as agent/hoofdagent. Ik waark nou veur n bedrief in Lelystad (mor woon nog altied in VLagtwedde) Ik geef trainingen in kommunikoatsie, omgoan mit agressie (zunde dat dat neudeg is...) en nog veul meer... Schrief al joaren gedichten, mor in Grunnegs nog mor n poar joar. Mien lutje wicht is twijtoaleg; Nederlands en Grunnegs.

Ie ook?

Schrieven ie ook in t Grunnegers, en willen ie joen gedichten hier ook wel publiceren?
Kiek den ais op de Openings bladziede en vul t formeliertje in.

Gain rekloame?

Nee, doar doun wie nait aan, mor ie maggen gerust rekloame veur Dideldom moaken...