DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Induzzeln
 
iemand inprenten wat deze moet zeggen of onthouden

Gerhard Tuinema.

Daaierntaimkes.


Van n kou

n Kou in Staindam most lest even kwiet:
"k Verlang toch wel noar vrouger tied!
aan spoiterij heb ik gain lol
geef mie mor n olderwetse bol".

Van n kraai

n Jonge kraai in Nijkomnij
was hoaneg en wol vrijerij
en dou e n nuver kraaike zag
was t, n wonder hoast, vot koop en slag
gain veurspul en gain flaauwe kul
nee, stap mor op en vot met t spul
hai docht : "Zo'n kans loat ik nait glippen
gain mooier waark as kraaikewippen.

Van n lintwurm

n Lintwurm zee in Hoaren bie Stad
"k Kin leste tied gewoon nait zat
dij vroatzucht is nait of te remmen
ik kon verdold wel n lintwurm hebben".

Van n katoel

n Katoel vloog lest boven stad
en docht : "Mien noam bin k meer as zat
ik hol nait van twijslachtighaid
t is kat of oel, mor baaiden nait".

Van n kat

n Krolse kat docht in Holwier :
"k Zoep mie mor weer ais zat in bier
want zeker woar, nog gain dag loater
heb ik n haile beste koater".

Van n knien

n Knien zat lestdoags in Kolham
in n lapke mous van Siebolt Stam
t Was n hail best stee woar ze dou zat
ze knabbelde zok lekker zat
ze zee :"Hier heb k ja glad niks te kloagen
dit binnen mit recht ja knientjesdoagen".

Van n hamster

n Hamster zat op t Legelaand
in n houk van schuur en leesde kraant
t minsdom leek verdold wel maal
t was weer rebulie overaal
hai docht : "k Goa dammee vot op pad
k vertraauw t mor niks, ik hamster wat."

Van n goldvis

n Goldvis van Haarm Stel oet t Woar
zee lest : "Ik wor wel honderd joar
want in mien ronde goldviskom
goa ik ja nooit t houkje om."

Van n fleddermoes

Op Povvert zee n fleddermoes :
"t Wordt ducht mie tied dat ik verhoes
k zeg nait dat ter aan t stee wat scheelt
mor aal doagen povvert, dat verveelt."

Van n doezendpoot

n Doezendpoot in Börkomnij
kreeg last van tonen-jeukerij
mor stumper kwam hail lelk te pas
hai wos nait welke toon of t was.

Van n bok

In Sibboern was n olle bok
dij geern nog noar de wichter trok
al kreeg e wel wat vollen in hoed
de krieg was der nog lang nait oet
lest, dou e weer n mooi sikje zag
was t haart van hom zò weer van slag
mor t wichtje woar e kiek op haar
haar gain belang bie n olle knaar
en wat e vruig of wat e dee
ze draaid' hom t gat tou en zee: "Nee"
hai kreeg dou nog gain kolle smok
dus, kört gezegd, hai schoot ter n bok !

Van n beer

n Slim hoeswaarme broene beer
zee vleden moandag in Sapmeer:
"k Heb t hier hail best en k leef zo vrij
op dizze olle boerderij
mor nou kin t echt gain snaren lieden
boer zee : "k mout neudeg beer ais snieden".

Van n loes

In Oskerd zat n vedde loes
al vaaier week in Graitjes bloes
t ol wicht haar doarvan glad gain wait
want al te hemmel was zai nait
mor in de nacht van old op nij
kreeg zai slim last van jeukerij
ze zöchde woar de oorzoak zat
en sluig de loes in ainmoal plat
dou dij zien aigen bloud bekeek
zee e vergreld :"Da"s n loezestreek".

Van n muske

n Muske zee körtsleden op t Zaand:
"k Bin bliede dat k hier bin belaand
gain beter stee as t pladdelaand
ik vuil mie hier as n musk'in t zaand".

Van n oakster

n Schewolder oakster is in meert
aan n navvelbreukje opereerd
t gebeurde - t was hoast oet en thoes -
in t Groot Schewolder Zaikenhoes
chirurg was dokter Jan J. Maaier
en ingreep duurde vief ketaaier
hou of t oflopen is vroag ie?
ik geef joe t antwoord vot ter bie
t is dulek da'k joe wat verknol
is ja gain zaikenhoes in Schewol
en doar komt bie, bedenk ik net
dat n oakster ja gain navvel het.

Van n roen

n Swaarde roen in Sloaperstil
zee: "Wat dij eelske meer toch wil
ze draait mor aalvot om mie tou
en k wait nait WAT en k wait nait HOU.

Van n vlo

n Vlo keek in n bokkeblad
en ruip in ainmoal: "Harregat
nou trapt men mie aal weer op t haart
mit koien van letters: VLOOIENMAART
en dat vin ik nou zo filain
goa der mor kieken, gain vlo te zain".

Van n zebra

n Zebra zee op Muzzelknoal
k Bin nooit ais baang dat ik verdwoal
want alderdeegs in n vrumde stad
vin ik wel weer t zebrapad.

Van n kou

Op fokkersdag in Luddeweer
kreeg Jurrie's kou de hoogste eer
t was twijmoal gold, dat was nait niks
en Jurrie snaarde din ook fiks
mor kou dij docht: "Woar blief je nou
mit joen verhoal: dom as n kou".

Van n kraai

"Ik bin, zee n kraai oet Beem beslist
de mainst bekinde componist
al wait men van muziek gain snars
elk blast wel n moal de kraaienmars".

Van n bukken

n Bukken zee lest op Ganzediek
"k Goa ducht mie mor op gimmestiek
al loop ik din nog nait op krukken
ik bin toch wel zo stief as n bukken!


© Gerhard Tuinema

De Schriever
Noam: Gerhard Tuinema
Geboren: 1923 Sibboern
Overleden: 17-2-2006 Stad


Ie ook?
Schrieven ie ook in t Grunnegs, en willen ie joen waark hier ook wel zain loaten?
Kiek den ais op de Openings bladziede en vul t formeliertje in.

© 2000 - 2017 Dideldom.comBiewaarkt: 11-06-2015Bezuikers: Grunnegers veur elk.