DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
In t achtern kommen
 
achterop raken

Christiaan Drenth.

Gedichten.


Jan Roos

Kist op Vismaarkt heuren,
Jan Roos zit in Herestroat
Hai zingt hoogste laid,
Mit pedde op de kop en stem van vermoad.

En als kwoajongen zeggen: "Kist ja aal nait zingen."
Komt stok omhoog en klinken zien woorden,
Als hai achter dij jongen aan rent,
"Kom hier stelletje lamstroalen"

Moar Jan dut aal gain kwoad,
Zet zug gaauw weer neer,
Tussen t volk in stad,
En klinkt zien stem gaauw weer.

Jan Roos beste vent,
Medallies op borst en stok in haand,
Zing dien laid deur t grunninger laand,
Zodat elk en generoaties laank,
Dien laid nog aal herkent.

Ain vrachtwoagen vol wolken

Mien leutje zeun kroop bie mie op schoot,
en keek noar lucht omhoog,
"Kiek pabbe." Zee t leutje jong
"Woar blieven de wolken nou?
Woar goan dij noar tou?
Ze goan aal in de weer,
de ain gaait weg en de ander komt weer."

Der rit n vrachtwoagen vol wolken deur lucht,
de aine blift dreuge, de andere geft regen.
En soms bin ze verkolden,
het t boven vroren.
Dan kinst de wolken heuren proesten
en slagt dunder die om oren.

Moar bie zetten,
Is t tied vrij veur chauffeur.
Din staait vrachtwoagen aan kaant,
en komt zunne der deur.
Mag vrachtwoagen op parkeerploatse stoan
en kin wie de heule dag noar speultoen goan.

25-06-2013

Opoe Tjaden

Doar klinkt gerommel en elk vragt: 'Wat is dat?'
Is t ain dunderbui op komst?
Nee, opoe Tjaden komt noar Stad.

Woar zai komt, goan auto's aan kaant,
Opoe Tjaden, opoe van t grunninger laand,
Aal 66 joar steut zai heur woagentje voat,
Dat, mensen, is t gedonder in de stroat.

Opoe Tjaden, leek veur gain dood te vrezen,
106 joar moar luifst mog zai hier wezen,
Of ze nait stokkend of dood kon,
Zo staait in elk bouk te lezen.

Dus komt er weer ain dunderbui,
En het t rommelen t hoogste laid
Woarschienlek is opoe Tjadden t din,
Dij mit karre deur t Hemelriekie gaait.

Vannacht bin ik zo schier overleden

Vannacht bin ik zo schier overleden,
Mocht die en onze kinder nog ainmaal zain,
Vannacht toun ik overleed,
Was ik nait alain,

De zunne kwam op,
De wereld kwam bie,
En vogels zongen zo schier,
Toun ik mien ogen sloot bie die,

Vannacht bin ik zo schier overleden,
Want aal wat moar ainmoal kin,
Wordt t schierste as God zien ogen even tou knipt en zegt,
"Oké, nog ain doetje din."

Mien haart zol nait meer kloppen,
Aal is mien geluk t aller grootst,
Want God luit nog ain doetje tou,
Nog ainmaol,
Vlak veur de dood,

Vannacht bin ik zo schier overleden,
Mocht ik die en onze kinder nog ainmaal zain,
Vannacht bin ik zo schier overleden,
Want mien laif ik was gelukkeg,
Gelukkig nait alain.

Zai

Zai is n vlinder,
Zwevend op de wind,
Zai is n ballerina,
Daansend as n kind,

Zai is n dreumer,
n Laidje in de nacht,
Zai is n troan,
Dij komt as ze lacht,

Zai is waarmte,
n Lach in de stilte
Zai is vreugde
Met oaf en tou wat kilte

Zai is as n engel,
Hou kold ook de nacht,
Zai helpt mie er deur,
Zai is.. ach, wat loop ik nog te riemen,
Zai is.
Doarom hol ik van heur.

Jeugd op Veenkolonie

Op Knoal ben ik geboren,
Doar vuil ik me dan ook thuus,
Op maarkt op zoaterdag,
Bie t krinkiespijer, of buinersluus,

Ben opgruid in Troapelknoal,
Doar et mien waaigje stoan,
En houw ver ik ook nog raisen mag,
Mien haart gaait hier nait vandoan,

AVEBE en woatertoren,
De herinnerns aan mien jeugd,
Jao ik kom van n Veenkolonie,
Doar ligt mien ziel en vreugd

Okke Geert Kluun

Dit is t verhoal van Okke Geert Kluun,
Dij leefde met koarten en flezze in t haand,
Zoop nait alain zien lever aan puun,
Moar ook zien verstaand,
En mog rondhangen op t grode maarkt,

t Spel was doan en t geld was op,
Gain sìnt op zak dat is n strop,
Binnenkaant van zien knip zo duuster als de nacht,
"Ik goa wel bie Vraauw Taaisman aan, docht Okke,
Mischain dat zai mien leed verzacht",

Hai was 24 en mit gain sìnt op zien gewaiten
Klopde hai aan bie wedevraauw,
"Vraauw Taaisman kinst mie wat geld veurschaiten?",
"Konst wel gek wezen, zee wedevraauw met verboasde kiek,
En doe mien geld verzoepen? Over mien liek!"

Okke wuir kwoad en nam törfbiele in haand,
Verloor zien aigen en verbriezelde heur verstaand,
"Doe goist mit, zee veldwachter loater tegen t jong,
Veldwachter had hom overlopen en Okke hong,
Gain genoade van Keunenk was hom gunt.

Dus gebeurde t 1838 11 uur krek,
Dat Okke stun op t plantail mit strup om nek,
De dag des heren twaalm april,
Hong Okke Geert Kluun veur t stadhoes,
Doodstil.

21-07-'06

Okke Kluun

d'Olle Grieze

Zai siert t groot loug met hail heur hart,
Woakt over t groot loug en Ommelaand,
Van Veenkolonie tot Hoogelaand,
Heb ik mien haart aan heur verpand

De tand der tied het zai deurstoan,
Wos in elke stried zuk te verweren.
En lopt mien pad ooit bie heur vandoan,
Zol ik in gedacht'n altied weerom keren,

Noar Grote markt of Herestroat,
Langs stadspoort of doarboeten,
Om zo bie elk bezuik aan t groot loug,
Mie in heur aarms te loaten sloeten.

Dij man dij met dij folders lopt (mien pabbe)

Deur weer en wind,
Van dag tot dag,
Elke dag mor weer,
Op vrijdagoavend kwam dij vracht,
Op zundag folders steken
En op moandag ging hai weer,

Met kraante en folders lopen,
Elke dag mor weer,
Fietstassen vol en vot,
Deur kôlle wind en weer,

Dust doe oost, den dou ik west,
Den kommen wie mekoar straks wel tegen,
Moakt mie niks uut ik vind best,
Allain is t zo kôld met dij wind en regen,

Hou kin dat nou, dien kaant is zo kört,
En toch ben ik zo ver veuruut,
O'joa nou ik weerom kom zug ik t,
Pabbe zit op proatstoul,
En het zien proatje nog lang nait uut,

Van Nijsblad noar folders,
En onderweg even proaten,
"Hest der mooi weer bie,
Beter den van t winter,
Man wat was t kôld."

Mor nou is t rustiger,
Ain haile nije tied,
Woarin pabbe noa joaren van zörg en aarbaid,
Nou even van de mooie dingen geniet,

Van schildern en van laidjes zingen,
Bingo en gymnastiek,
En of en tou als hij allenig is,
Even weer terug denkt aan dij tied.

20-1-'06

Laive God

Laive God, mag ik joe wat vroagen?
Misschain even tussendeur?
Nait dat ik wil kommen zeuren of kommen kloagen,
Of joe met einig vluiken steur

Ik wol jou geern wat vroagen over mien daairboaren,
De realiteit en mien toukomstperspectief,
Ie wait wel de tied dij ik mag slieten,
Met ain wichtje genoemd: mijn lief,

Laive God loat ik bie het begun begunnen,
Is het woar wat er in de biebel staait?
Dat elk meens dij het van de dood nait kon winnen,
Noar joe, naor de hemel gaait?

Laive God hou is t den met mien opoe's en opa's,
Mien nichtje Christina en Fré mien oom,
Siem en nathalie, ie wait wel dei twei klasgenoten
dij verongelukten bie dij boom.

t Twijde laive God is de realiteit,
Woarom zoveul oorlog en zoveul sloaven,
Zoveul honger en kindsoldoaten,
Zoveul hoat en zoveul nijd,

Mag veur de jeuden ooit nog vree komen,
Wordt de wereld ooit nog ain,
Of mouten zij ook blieven dreumen,
En is t beloofde laand veur t rieke westen allain?

Het leste laive God dat is mien toukomst perspectief,
Ik zee t net aal, de tied dij ik mag slieten,
Met ain wichtje lief,

Woarom loop ik alend maar in doalen?
Woarom nait op, aal is t ain klaine, heuvel van geluk,
Woarom loat de laifde mie steeds op mien bek vaaln,
Woarom moakt de laifde mien haart steeds stukken,

Laive God,
Dit waaren dan mien vroagen,
Zo gewoon over het leven,
O joa, der is nog ain vroag dij ik zol willen stellen,

Laive God,
Mogen der op sommige van dizze vroagen,
Asjoeblieft antwoorden wezen



De Schriever
Noam: Christiaan Drenth
Geboren: 1979 op t Knoal
Woont op: t Knoal
Schrift al: al n tiedje

In t begun eerst mit laidjes, moar uuteindelk ook mit dichterij. Der is n bundel van mie uutkommen, te bestellen via mien e-mail of www.freemusketeers.nl

Ie ook?
Ie schrieven ook gedichten in t Grunnegs en willen dij hier ook wel zain loaten?
Kiek den even op de openingsbladziede en vul t formeliertje in.
© 2000 - 2017 Dideldom.comBiewaarkt: 28-11-2016Bezuikers: Grunnegers veur elk.