DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Riepe
 
voetpad, trottoir

Anna Geertruida de Vries-Maarhuis.

Gedichten.


Goa nait vot

goa nait vot bie zunschien
nait as t duuster wot
meschains mit lichtmoan?

gain schaar kins zain
heurst die zulf lopen
knistern van drög blad

voutstappen ain veur ain
toesnust in kop
dood kin die aanroaken

goa nait vot oet dizze tied
nait bie duuster
nait bie lichtmoan

haildaal nait vot
schimmern van mörn
lichtmoan bezied, diezeg zunschien

goa toch weer op hoes aan
mit licht, vot toesnust
weerom in dizze tied

aargens zèl k die tegemuit kommen

Bliedschop boven Grunnen,

Dou eerde moakt wèr
dogde oans Laimeneer
k dou Nederlaand mor ais aan
zet Grunnen op koart, wel te verstoan
schaaiden leg k nait tot
Zwolle, mor k bin wieder goan
Roodschoul nog veurbie
Zo dogde God, zo dee God.

Aander lu, wierden, klaai
wolken, zun, moan
aal schient hier ook, steerns zain
ie hier zulfs aan hemel stoan
wat gaait boven Grunnen?
zoveul schiers mit peerd en kou
bliede mit mien laand, hou begunnen?
Van Lauwerzee tot Dollard tou.

Miemern

As regendrupke
ais n smok
weden kon, hail zaacht
veur lu dij zo mor
deur grofdoadeg geweld
oet dizze tied goan.

as ain snijvlok
snoetjeknovveln kon
mit aal dij lu
dij zo mor nait meer
in dizze tied stoan
mit n snijbaal vol gelok.

as ain störm
aal verdrait vot kon
poesten mit zaachte oam
elks bloadje, elks sprik
mit n lag omdeel luit valen
in dizze tied.

as ain woord hier
deelzet wot mit zoveul
gevoulens, zoveul pien
omdenken mit minsken
dij zunner woord zunner wies
der nait meer binnen.

Bliedschop

Bliedschop
vrundschop
woorden dierboar
dankboar.

Mien verhoal

Mien verhoal
mien toal
op pampier
t staait hier.

Vlinder

Vlinder
omswinder
deur dik en dun
waarme zun
n blom
veujoar, kom, kom.

Wied vot

Wied vot
is hemel
wied vot
bist doe
wied vot
mien laifste
nait vot
oet mien haart.

Mien verhoal

Mien verhoal
zunnekloar
dien verhoal
is doar.

Oel

Oel in boom, n vremd fertuut
mit zeuven slikjes in puut.

Swieniegel ruip, onner heeg vandoan
"loat puut hier mor eefkes laangs goan."

Tiekje zat op n grode stain,
zee, "laive oel geef mie der ook ain."

Knien vanoet zien hoeske, ruip
"geef mie ook geern ain in mien voestke."

Hoagedis zat onner blom
ruip, "k wil slik, k wil slik, kom, kom."

Mor wat dee oel?
hai ging hinneweer mit zien oelekop
deugennait vrat aal slikjes zulf op.

Omtoald oet t Engels

Blomkes in mien toen

Blomkes in mien toen
waiten nait wat heur overkomt
d haile winter in blui

blomkes in toen
eefkes slap aan steel
blaauwe droefkes

blomkes in toen
oetwozzen tot schiereghaid
blomkes in mien toen.

k Schrief ien braif

k Schrief ien braif
k heb die laif
haar k dat nait doan
zolt ja nait in dizze braif stoan.

Zomoar n woord

Zomoar n woord
oet mien haart
zomoar n woord
dat verwaarmt
zomoar n woord
k huif niks te zeggen
zomoar n woord
niks oetleggen
zomoar n woord
niks oetfigelaaiern
zomoar n woord
alinneg pebaaiern
zomoar n woord.

Vlaigen

Kinst nog vlaigen
wied vot, over laand
heur noar dien haart
wind kin ja nait bedraigen.

Wereld woarin wie stoan
woar komst aiglieks vot
minsken lot?
mit golden vleugels zai k die goan.

Wied bie mie vandoan
n duuster gerdien
mien God, t geft weerpien
zai k die, stoef bie steerns, bie moan.

Vlaigen, ook as t nait gaait
in mien dreumen goa der maank
moar ja, n swoare daank
haildaal niks wat in mien denk bestaait.

Stiljes

Hail stiljes
achter mien pc
kiek k veur
mie oet.

k Wil
oaf en tou
mit aander ogen
kieken, wat slichter.

Aiglieks hail stiljes
nijsgiereg noar
mien kiekdeus
t veraandert nait.

Blief moar
kieken, n daipe oam
ledders kommen
nait vanzulm.

k Mout moar
weer mit spul
aan loop
goud veur mien denk.

Wietwerd

Doar was ais in Wietwerd n kerel dij
meulen moaken wol, noagelnij
hai dogde daip noa, wat hait
zee dou kordoat, dou t nait
k heb din "ZELDENRUST", wis noeit vrij.

(Meulen hait "Zeldenrust")

Hoezen

Doar was ais n kerel in Hoezen
dij allernoast maal was
op roomsoezen
moar t kwam hom nait goud te pas
wis komt leste stunt
ie willen t loven of nait
kerel noar koezenropper tou gerunt
nou jeuken hom aal zien koezen.

Toubinden

leeg pampier aaid
zunder woorden
as der wat staait.

Spaigel
dij mie zigt
zegt, goa deur
mien wicht.

Vaast bieten
in ledders, schrief
swaart op wit
veur aiveg, k blief

Tougang
tot mien haart
dat deurdringt
din n snittje waarmt.

As der wat
staait mien wicht
blief veur aiveg
t vaalt sikkoms ligt.

Neem tied
om laif te hemmen
neem benoam tied.

Soamen dailen
soamen beden
soamen geluk
soamen leven
soamen doun.

snoetje knovveln
niks vot movveln
liek der veur
van hom noar heur.

Komt ain oet tied
nog is der laifde
zun schient
moar stroalen binnen vot.

Laifhebben
laifde
holden van
minsen
aaid weer.

As ik kom
din bin k der nait
moar kom ik nait
din bin k der aal
sums kom k vrouger
of loater
moar kommen dou k.

Mien laifde

tied keurt
tied kleurt
sekondewiesder dwingt
uren vot veur n nij begun
tied dringt
tied vringt.

Bist dicht bie mie
en doch wied vot
wied vot
veurbie.

n Doetje
op dien snoetje
moar n smok
geft ook geluk.


De Schriefster
Noam: Anna Geertruida de Vries-Maarhuis.
Geboren: 1939 Laskwerd (stoef bie Schildmeer)
Woont in: Middelsom
Schrift al: Om en bie 25 joar.

Noar schoul goan in: Sibboeren, loader doar ook woonderij had mit mien pa en moeke (op Leentjer). In 1963 bin k traauwd mit Henk de Vries (verhoezer, boderieder) in Hoezen (Huizinge). Schreef in 1989 mien eerste boukje "Maggels", en in 2003 mien twijde "Laifkeblommen", gedichtjes over laifde. Mien daarde boukje gaait over hail aans wat, mien man is drij leden oet tied kommen (Alzheimer) doar schrief k over. Dou t om aander lu doar mit te helpen. k Schrief in mien mouderstoal, omreden dat mien toal is, woar k in dink en dreum. Speulen mit ledders en woorden. Veurlezen op schoul is ook schier waark.

Ie ook?
Schrieven ie ook gedichten in t Grunnegs, en willen ie ze hier ook wel ploatsen?
Kiek den ais op de Openings bladziede en vul t formeliertje in.

© 2000 - Dideldom.comBiewaarkt: 04-04-2013Bezuikers: Grunnegers veur elk.