DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Inroamen
 
omramen, inlijsten

Ab Detmers.

Gedichten.


De laifste van apmoal.

k Heb t smis nog aal nait begrepen
Dat k zo n gelok had heb kink din nait bie
Ik kon altied hail wat wichter verslieten
Mor zo as doe was der gainain veur mie.

Smis waren mien gedachten aaldeur bie die
Smis din wol k geern das t vernaamst
Smis drukte k die zo geern tegen mie
Gingen doagen veurbie das t nait kwaamst.

Der zit n roemte in mien haart vaast
n Roemte veur die hail appaart
t Is n roemte woars t doe zo goud inpaast
t Steke zit midden in mien haart.

Joa doe bist laifste van apmoal da s de pest
De laifste van apmoal veur mie
Doe was t nait mien eerste mor wel mien lest
k Hol ja nog aal zo veul van die.

(Hier din n raimke vanoet de legende over dij ole hekse Taitje. n Ol wiefke dij in laankmanstied woonde aan t Schildmeer. n Altied winderege houk tegenover Staindam hait nog aal Taitjehörn.)

Taitjemoushörn

Taitjemoushörn

Der was aan t Schildmeer ais n wiefke zo lelk
as zai ruip en reerde din iezelde elk.
Heur noam was Taitje t was n wiefke hail klaain
mor mit n stem as n duvel en n haart kold as stain.

As viskerlu oetvuiren en t woater was slicht
zat zai in t rait mor hail mond stief dicht.
Gainain dij heur zag mor zai was der op en top
en gloop deur t rait mit d ogen grel in kop.

t Duurde nait laank of störm stak din op.
As verege hekse mit t hoar roeg om kop
groalde zai en beswoar din de noatuur.
Veur mennege aarme donder sluig t leste uur.

Zai hoelde zai flitterde en gilpte as n swien.
Zai woarde gainain t was altmoal venien.
Manlu lagen in de plomperd t was hail vilaain.
As ze verzopen in de daipte laagde zai gemain.

t Ol mins is nou verswonnen wel wait der nog van.
Ontgeven is t woater doar liek tegenover Staindam.
De viskermans diesel zet t smis aal in de rook.
Trekt n vore deur t woater en t verleden in de dook.

Woarom meedlieden

Woarom meedlieden.

Woarom aal lellen over dij blinde
Zien leven is nait duuster mor verlicht
Wat wie zoaal zain geft veur hom gain hinder
Wat hai zugt stroalt hom van t aangezicht.

Woarom meedlieden mit n verlaamde
En net doun of hai niks meer kin
Woar wie zoaal achter aan runnen is schaande
Hai bekikt het aans meer nuchter mit meer zin.

Woarom n oordail over d ontspoorden
Binnen wie din zo goud dat wie dat maggen
Houveul doun wie verkeerd mit mooie woorden
Dij illende brengen loat mie even laggen.

Spoar joen vaalse troanen veur de raauwnde
Loat hom strieden din tonen joe pas moud
Hai zel joe bedanken veur dat opbaauwnde
Wil groag vrund blieven t komt wel weer goud.

Joa zai binnen nog goud wees mor blied
Hou s dat mit mie din in dizze tied
Zai binnen nog goud en blied in dizze tied
Hou zit dat mit mie din bin ik wat kwiet.

Scheepsjoagertjes

Veurbie

Dat törfschip wer trokken deur weer en wind
riet aan gain geplaas zee moeke tegen t kind
t was haard en mit recht n stried veur t bestoan
t is nou nait meer neudeg t is aaltmoal vergoan.

De koftjaalk op zee en schipper dee zien plicht
n veurbeeld van kracht wat n machteg gezicht
geweld dat hom taisterde dee hom nait zeer
zien zaailen aan de wind wie zain dat noeit weer.

De kuster ons tröts dat grieze geweld
bevuir alle zeeën kaptaain was n held
mit zeeg deur t woater de loeken onder t klaid
t is aaltmoal veurbie onnudde zo vraid.

Woar binnen ze bleven dij schepen van weleer
klippers en tjaalken binnen der hoast nait meer
t is aaltmoal veurbie veur aiweg ja vot
dij glans en glorie t is hailndaal kepot.

Stilte op t Wad

Stilte op t wad.

Woar t woater laif
tegen sliekraand stöt
en steern zo geern
op t slovve nust bröd
liekt t aivege leven
wel aarg stoefbie
dij stilte omaarmt mie.

Doar klaauwt n schipke
luddek mor staark
bedrievege viskerman
dut toerloers zien waark
netten vol gesparrel
t is ja dudelk te zain
oh dij stilte steurt gainain.

Leutje koap komt te vlocht
t is moeke dij over hom soest
mor kiek nait bloots in locht
ook noar t woater dat broest
t blode oog kin t hoast nait zain
mor t gait wel stoareg achteroet
zai ik t goud is dat doar al groet.

Mien vrund de wind
fluustert mie in t oor
as wie t zo holden
is t nog glad veurmekoar
mor wees nait aigenwies
kiek ook ains om die tou
beloofst mie dat... tou nou.

Oh loaten w ons nait verachtern
mor strieden mit aal ons macht
wees bliede mit dij riekdom
veur t aaltmoal is verkracht
t is ja zo n wonderboar aarfstuk
veur ons en hail t noageslacht
goa t nait verkontjen dij pracht.

Op fietse noar t Schildmeer.

Wie op fietse noar t Schildmeer
Mit dit illendege honneweer
Laange spiekerboksems binnen oet
Mor bainen glimmen wit as stoet
Auto s knappen bie ons langs
Wie vuilen ons daarde rangs
Gegloep achter gedienen
Wie zain der ja oet as swienen.

Kwoajong achterop krigt vout in t rad
Ropt au au au pa vergreld wat dut dat
Hol doe drij weke de kop der mor veur
En gain gesakker gedonder of gezeur.

Moeke stapt òf t hoar nat op kop
Even wachten hur k bin bobberd op
Plestiekjaaze tot enkels tou
Vot mor weer jakkel wat n gedou.

Kampeerploatse is mor haalf vol
Net verzopen muskes wat n lol
Wie zitten ons zo te verbieten
Goan doezend moal mins-erger-je-nieten.

Hè hè vekaansie is stoareg aan veurbie
Dammee aan t waark is n zegen veur mie
k Heb ja totoal gain gouds te melden
Allinneg mor dat kankern en schelden.

Op t leste goan we din weer noar hoes
In wind op moeke het n nadde bloes
Laange spiekerboksems kleddernat
Plakken om bainen arregat
Auto s knappen ons weer veurbie
Wat is t ook ja n kripsie
Drij weke regen wat n lol
Wie hebben moage goud vol.

Mien dreum.

Vannacht toun k lag te sloapen
dreumde k van n hail nuver wicht
zai aaide mien haand zo zachies
k smokte heur aal op t gezicht
ik swoor dat k heur aiweg laif haar
en heur noeit in steek loaten zol
zai vliemde zuk tegen mien scholder
zo laif en krekt vuilde ze wat k wol.

Ik woande mie ja in de wolken
vruig of ze mien vraauw worden wol
zai zee hail geern mien laiverd
k was zo bliede mien ogen schoten vol
wat was ik toch ziels gelukkeg
wie baaident zo as man en vraauw
k beloofde heur geliek van alles
veuraal veul laifde en mien traauw.

In mien dreum joa in mien dreum
doekdest die tegen mie aan
in mien dreum joa in mien dreum
kwamen wie van t ain in t aan.

Dou in ainen schrok ik kloar wakker
want liekbendeg smakte ik op grond
woar was nou toch dei laiverd
ik loerde wat verbilderd in t rond
maank loakens op t ieskolde swilk
aggewaaierde ik blaauw verkleumd
gain smokjes of laif zaacht smoezen
wat schane ik haar t ja mor dreumd.

Steern

Doar aan t Wad

t Gereer van de steern en t sweven van de koap
dat beleef ik zo geern doarom zit k hier zo voak
t geluud van de boaren t gesputter tegen de diek
dikke pieren as mien vinger aggewaaiern in de sliek.

n Broes over t woater n zilte damp moakt mie nat
doar krieg k weer n flotter t is roeg hier aan t wad
mor binnenin mie is t vredeg zo oproemd en blied
gain ombaalgen gain raagen nait bezeg dij stried.

Oh dij wind over t sliek oh dij roege locht
oh dij wereld achter diek mit de koap in de vlocht
oh dij wind deur mien hoar en de kop in de nek
oh dij wereld achter diek da s nou net mien plek.

Och Here loat toch dij pracht van dat roege en rust
bestoan veur t noageslacht hier aan de Wadkust
de schoapen op de kruun noatuur blief rioal
geef ons blievend vertuun wie danken Joe aaltmoal.

De Kunstschilder.

As ik zo aan t meer stoa te kloddern
vuil k mie n keunenk zo riek
dat ik dat toch maag
op zo n nuvere daag
zun in rogge ik laag.

k Zit hier allain mit kwasten en vaarf
en t woater dat snabbelt mor deur
mien vouten voel en nat
mor och wat zol dat
thoes is ja zaipe zat.

t gait mie bloots om de kleur
en der maank heuren is t ja altmoal
as n viske zo vrij
gain kopschraaberij
in t raait mit woater tot knij.

doar zaailen n poar bootjes zo stil
t robbelt de spaigel hoast nait
in ainen woaren ze mie
en sturen stoef bie
nikkoppend drieven ze veurbie.

ôle hoes

Dat ôle hoes

Doar staait dat ôle hoes
t was eertieds n villoa
aan platlopen weg langs t moar
t is nou hoast n bult puun
veurbie is dij schoonhaid
mor t staait der nog aal
noa zoveul joar.

En as snijflokken vlaigen
zo tegen midwinter
of woater gobt in stroalen
en de wind is fris
din zai je doar n ôle man
dij strompelt deur de toenen
mit heufd gebokd in gedachtnis.

Proat gait dat t aal kommen is
deur zien laifde veur n wichtje
dij verzègd het hom te traauwen
hai was ja zo blied
mor heur laifde versmolt
toun t hoes ainmoal kloar was
t staait der nóg leeg…veur altied?

Oldambt

Delfsieltje

In Delfsiel bin k geboren mien waig het hier stoan
midden maank zeeluu en eerliek bootwaarkersvolk.
Joa ik vuil mie hier riek mit de diek en de sliek
smis grode boten langsziet de kooimuur.

Ik heb hier ja speuld ik haar hier mien waark
mien vraauw en kinder dij vuilen zok hier staark.
Wie laggen en schraien wie waarken en vlaigen
dag in en dag oet mor wat geft dat.

Mensen om mie hèn dij vuilen zok verwend
mit ploatske aan ol Eems t hait ja Delfsiel
doar is t goud oamen maank schepen en kroanen
elk zel der verkloaren k heb gelok had.

Joa Delfsieltje is gain Stad
mor gebeurt van alles wat
mit dat steke aan de zee
bin k slim tevree.

Ainzoam

As t doe ainzoam bist.

As t doe ainzoam bist
Goa noar boeten kiek even op stroat
as t doe ainzoam bist
goa der oet t is noeit te loat.

Der is wel ais n dag das t doe ainzoam bist
allain op de wereld mit kop vol onkruud
goa noar boeten proat mit elk dij s t kinst
Kwak over dien illende smiet t der mor uut.

Elk krigt wel ains n tied dat t nait meer wil
gelokkeg hest doe dat nait allain
blief din nait zitten in n houkje zo stil
proat ains mit n kander loat die mor zain.

Snak wat mit kinder zai lustern aibels groag
noar dien verhoalen over vrouger tied
der komt din al gaauw gebrukelke vroag
hebben ie dat beleefd..... Joa wees din mor blied.


De Schriever
Noam: Ab Detmers
Geboren:
Woont in: Delfziel
Schrift al: joaren

Joa, op t heden is schildern weer n luk bietje in bie mie, mor der is n tied west dat ik as ain van d eersten van de Grunneger Schrievers nogal drok bezeg was mit schrieven verhoalen vertellen en dichten.
Toal en Taiken hebben toun hail wat van mie opnomen. Kunstgang Kaampe in Steem bin'k ook nog bie d oprichten west.
Zoas eerder zegt, k heb t nou drok mit schildern en tentoonstellens. Kiek mor even op mien Web-log, din krieg je n beeld van mien doun en loaten. Der stoan ook wat verhoaltjes op in t Grunnings. Dij toal mout der inblieven en smis tot groot verdrait van elk en ain proat ik (lel ik?) lekker deur. t Gait aal zo makkelk.

Ie ook?
Ie schrieven ook gedichten in t Grunnegs en willen dij hier ook wel zain loaten?
Kiek den even op de openingsbladziede en vul t formeliertje in.
© 2000 - Dideldom.comBiewaarkt: 05-11-2012Bezuikers: Grunnegers veur elk.