Herman de Jong.

In t eerste kwartoal van de veurige eeuw binnen der hail wat Grunnigers vertrokken noar Canada en Amerikoa.
Om reden dat de landbouwmachiens in de ploats kwamen van de staarke aarms van landarbaiders. In de provincie Grunnen waren der nait veul febrieken woar waarkloze landarbaiders zich nuttig konnen moaken, behalve de strokarton en eerdappelmeelfabrieken bie Pekel en Hoogezand din, en zodounde kwam de emigroatie op gang. Amerikoa was het land van de toekomst. Doar gruiden de dollars tussen goldjebloumen. Voak kwam t anders oet.

n Grode groep Grunnigers dei gain geld harren om laand te kopen belanden in Chicago en kwamen te waark op de beestachtige grode slachterijen woar elke dag doezenden koubaisten t leste levenslicht zagen.
t Was min waark. Begunners mozzen daarms en andere rotzooi van de vlour in geulen vegen.Ondergronds waren der enorme oafvoerbuizen dei t spul oafvoerden naar het grode Lake Michigan. Oaf en tou roakte zo'n buis onder de slachtploatsen verstopt, voak deur ongeboren kaalver. Den mos ain van de Grunnigers of Polen deur t iezeren loek, buusdouk veur neus kop, deur de jirre graaien om de verstopping aan zied te moaken. Nou dochten ie zeker dat doarom onze pervinciegenoten gaauw oetkeken noar ander waark. Tenminste, dat zol ik doun.....

Inderdoad, ain veur ain verlaiten de Grunningers de slachterij. Moar om n andere reden. Zai mozzen noamelieks op Zundag waarken, want febriek kon moar nait zo moar n dag stil stoan. Veul van dei Grunnigers waren geriffermeerd en den wait je t wel: de Zundag is veur de Heere God. Domies bandiesden van preekstoul dat n grode zunde was om de dag des Heeren te onthailigen, en veul mannen in kerk schudden mit kop of ze zeggen wollen: man, hol toch op mit dat gedoas, zollen wie dat nait waiten, mit dat gebod binnen wie vrouger ja groot worden!

Emigranten doun voak t waark woar de inhaimse bevolking neus veur optrekt.
Zo kwamen veul Grunnigers bie de drekstoupen terecht. Hoezen harren nog gain deurspoel Wcs en voak was der n hoeske mit n tonnetje achter in schure of boeten. Tussen twei stroaten in was der den n zandloane woar drekwoagens elke weke dei tonnetjes leegden. Gain mooi waark, moar Grunnigers harren der plazaair in, verdainden hoast net zo veul as op de slachterijen, en konden Zundags noar kerk. As ie nou in Chicago rondscharrelen kinnen olle emigranten joe nog aanwiezen woar de Grunniger buurt was.

Dit moeske het n steertje! Huizinga's Sanitation System is ain van de grootsten in Amerikoa en zo is dat vrouger begonnen... mit drekwoagens in Chicago! Huizinga is n bekende Grunninger noam, denk moar ains aan Huizinga's zangklassen... oldere mensen waiten doar nog wel van oaf. Nou den... nog nait zo laang leden kocht de multi- millioniar Huizinga de Blockbuster video winkels. Noar ik heur hebben ze t ook al weer verkocht!
Misschain omdat je bie dei winkels ook porno films konnen huren? t Ken wezen dat de huidige Huizinga's nog 'fien' binnen.....

n Andere bekende noam in Noord Amerika is Hekman's Cookies. De febriek staait in Grand Rapids. Dat is nog femilie van de Hekmans, dei vrouger in Blijham woonden. In Canada eten wie dei koekjes nait, want wie hebben hier de Voortman Cookies febriek in Burlington, Ontario.
Zol dei Voortman ook n Grunninger wezen?
Wel kin mie dat vertellen?