|
Zuster
Zuster mag ik joe wat vroagen?
Mien hoar zit nait goud
k'wil nait kloagen
moar zo... zit het fout.
Zuster, mag k joe wat zeggen
wilst mien kleren
nait over baank hin leggen
doe most nog hail wat leren.
Zuster, most s kieken
hest dij foto's zain?
Mensen dij mie ontwieken
is dat nou wat k verdain?
Zuster, most nou s horen
zeuven kinders hek had
drij bin ik al verloren
wist doe dat?
Zuster, waist wat k heb mitmoakt?
Heb in n kamp zeten
woar minsen werden oafmoakt
de jeugd... is dat al laank vergeten.
Zuster, kennen joe ook zo'n angst
dat vandoag de leste ken wezen?
Ben dan op mien bangst
gaist veur dien leven vrezen.
Zuster, zal k die wat vertellen?
Spoar al mien pillen in dat roze loaken
veur as mien leed blieft kwellen
ken den zulf n end aan mien leven moaken.
Zuster, k heb zo'n verdrait
pien in mien haart
zain kenst t nait
vuilen is woar t om gaait.
Zuster... bist n laif wicht
luustern kenst goud
heb mien haart wat verlicht...
wat tot end of doagen rouwt.
Zuster... k wil nog ain ding kwiet
neem n dropje bie vertrek
vroag toch al te veul tied
moar... bedankt veur dit gesprek.
|
