DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Wènst
 
heimwee, verlangen

Wim Pekelder.

Verhoal.


Duukboot

'Te koop aangeboden: Aanhangmotor 10 pk iets defect', ston op t braifke op t prikbord bie C 1000.
"Dat is wat veur ons boot", zee Haiko, "Doar mouten wie met Pa over proaten, Pa hÚt verstand van motoren, dij ken hom vast wel weer aan de proat kriegen".

t Was toch nog n beste put veurdat de motor weer in order was. Krougboas uut t Westen was ophollen met bootjeverhuurderij en doar haren ze omschik n schier bootje op kop tikt, woar de motor pecies in paasde.
"M§rgenvroug goan we proefvoaren", zee Pa tegen Haiko en Henkie.
Eindelek was t den zo wied, motor wuir achter de boot hongen, ainmoal aanslingern en doar ging t hìn.
"Joe mouten veur in boot goan zitten", zee Pa, "motor is aiglieks wat aan de swoare kaande".

Pa gaf volgas, punde van t boot kwam n best ende omhoog.
"Der mouten zandzakken veurin legd worden", ruip buurman van t daipswale vandoan, "din blift boot beter in evenwicht".
"Bie Rode Til wordt veul snoukboars vongen, loaten we doar m÷rgenmiddag hén voaren. Dat is den met ain n mooie testvoart veur d boat. As we direkt noa t brood eten hier vot goan din hebben we nog de haile middag veur ons".

t Was nog n beste tocht deur t Zieldaip, eerst deur t Westen en den bie t Woarschip rechts aanhollen.
Noa n stief uurtje voaren kwam Rode Til in zicht.
"Wie kennen t beste tegen t bos aanleggen", zee Henkie, "den liggen we mooi in t schoel".
Motor wuir uutzet en kaalm luiten ze zuch noar t kaande drieven.

Hengels wuiren kloar legd en t wachten op biet kon begunnen.
Snoukboarzen luiten heur nait zain en noa n uur was lol der schier òf.
"Loaten we t nog ains bie de Westerse Meulen perbaaiern, want hier zit toch gain vis".
Noa n haalf uurtje kwam de meulen in zicht. Wie doun motor uut en loaten ons met stroom mitdrieven met hengels boetenboord.

"k Heb n poar vlezzen rooie wien uut kelder mit nomen, t komt uut Pa zien Kerstpakket. Hai lust gain wien, t is hom veuls te zoer en hai krigt t er kopzere van".
Toun de vlezzen leeg waren, wuiren d hengels opb÷rgen.
"Wat is t ja misteg worden", zee Haiko, "k kin de meulen al nait meer zain, wie goan noar huus tou, want zo is der nait veul oardeghaid aan".
Motor wuir aansloagen en hai luip votdoadlek as n tude.

Met n kaalm gangetje ging t op huus aan. Zai haren al weer n nuver stukje voaren, toun ze veur zuch n brugge zagen. Net op tied konden ze de boot aan t kaande kriegen.
Mor wat is dat nou, dit is toch de brugge in de weg van Scheemde noar Noordbrouk, hier tegen t bos hebben we liggen te snouken. Deur dij mist binnen wie bie de meulen de verkeerde kaande op voaren.
Veur de twijde moal ging t op huus aan richting Nijwolle.
"Wie mouten mor wat meer gas geven, aans binnen we nait veur t duustern thuus. Kiek doar hebben we de meulen al weer".

Langzoam trok de mist op en bie t Woarschip was t weer hailemoal helder.
Toun ze bie de Kolke van museum gemoal aan kwamen voaren, ston Moeke al te wachten.
"Wat binnen joe ja loat, wie mouten votdoalek eten", ruip ze van t kaande of.
"Nog ain rondje en den kommen we der aan", zee Henkie.
Hai trok t gas hailemoal open, motor brulde der over, neuze van d boot kwam omhoog.

Noa twij rondjes was t mooi west. Haiko dee t gas dicht en t wuir stil.
Neuze van d boot ging opains met n gang noar beneden, de twij zandzakken begonnen nog verder noar veuren te schoeven.
t Was net n duukboot, binnen twij tellen was boot onder wotter verdwenen, Haiko en Henkie swommen noar kaande.
Op stee woar boot zonken was brobbelde nog wat, mor van boot was niks meer te zain.

Ploatst: 3 jannewoarie 2021



| Nije buren | Domme honden | Nije gedienen | Duukboot | De Buurman | Sprutternust | Op fietse | Dikke tone | Horlosie | Nije schounen | Appelsiene | Stoomtraain | Brommelwien |

De Schriever
Noam: Wim Pekelder
Geboren: 1943 op t Sapmeer
Woont in: Nijwolle
Schrift al:


k Heb tot 1996 op t Sapmeer woont, doarnoa bin t wie verhuust noar Nijwolle. k Heb waarkt bie de maatschappelijke Dienstverlening. In '96 binnen wie n bootjeverhuurderij in Nijwolle begonnen.
Riemseltjes mos k aaltied moaken veur Sunderkloas veur aal de femilie en ofschaid van collega's.

Ie ook?
Ie schrieven ook (wel ais) in t Grunnegers en willen joen verhoalen hier ook wel zain loaten?
Kiek den even op de openingsbladziede en vul t formeliertje in.

© 2000 - 2021 Dideldom.comBiewaarkt: 03-01-2021Grunnegers veur elk.