Roel Sanders.

Verhoal.

n Onschuldege Belg

Körtsleden mos k noar t Zaiikenhoes veur n MRI- scan. Mien rechterhaand gong bie toeren zien aaigen wegen. Nait gevoarlek, mor bie toeren wel lasteg.
Veur de wizzeghaid mos k van hoesdokter noar t zaikenhoes. De 'zenendokter' mos der mor ains noar kieken.
Noa wat weken kreeg k oetslag. Nait alermerend, mor har doch n vroage. Aan rechterkaande van mien hazzens zag e bie sloape n swaarde stee van sikkom elf centimeter dij doar aigenlieks nait heurde. Roar en unverkloardboar! Har zoch dat aan linkerkaande dinken kind, mor nait rechts!

Dou schoot mie plotsklaps wat in t zin. Dou k zo'n beudel was van roem vaar joar, har k n trap van n peerd had. Veur t waark op baauwploats har mienvoader n Belgisch peerd aanschaft. Dij har wel wat forsie in bainen.
Dij dag aanders was voa achter in t veld op n aanmoakte bunder aan t waark west. Dou e snommerdags op t iezend peerd noar hoes korkjede, bedocht e, dat e peerd mit vool wel gliek mitnemen kon. Har aans gain helster mitnomen, mor n regte boer is nait veur ain gat te vangen. Kreeg zoch n stok boertaauw (n stok ofrasterndroad), dee dat om haals van t peerd en gong verdan noar hoes. t Vool fokselde vlaigachteg noast heur meer.

Bie hoes wer fietse aan kaande zet; t hek lösdoan en peerd en vool op t kaampke veur schuure loaten. Bie schuurdeure stond k as lutje boer t span op te wachten. Kreeg van voa t lösse stok droad en toak rusteg stil te blieven stoan. Mien voader wol t hek sloeten en zol votdoadelk weeromme kommen. t Luip wat aans. n Oomke van mie kwam der krek langes en muik n proatje. Van proat komt proat, van dij gevolgen, dat n nogal n zet duurde veur en aleer mien ol heer mien 'toak' overnemen kon.

t Was aal goud goan, as t vool nait om heur mouder lopen goan was. Om te zain, woar heur jong zoch ophuil, draaide t peerd heur omme. Kreeg n stok droad tegen heur bain, schrok heur t oapezuur en tilde t bain op.
Ik kreeg zo klaain as k was n schop veur de hazzens! t Gaf mie doch n bult konsternoazie. Voa het mie votdoadelk op aarm kregen en mie in hoes droagen. Ollu zellen der wel terdege over proat hebben. Voa zel wel ofgemieterd op t jak kregen hebben veur zien onachtzoamhaid. Zel wel n zet vol zölfverwiet zeten hebben!

Loater het hoesdokter (Dokter Bangma) mie opereerd op toavel van t kebof. Het mit wat 'kloare' de wond oetspuild en hoed mit vattien krammen weer bie n kaander trokken.
Gelokkeg is t aal goud kommen. Gain melleur aan n oog of zokswat meer. Kreeg van mien ollu, as goudmoaker n speulkammeroadske, n levverd.!
Doar heb k aans nait laank wille van had. Dou e noa n poar moand boetendeure wat op blaik rond gingelde, was t krek oet mit plezaaier. Hij mos doadelk t veld roemen. k Zel der wel nait wies mit west wezen. Wieders heb k der niks aan overholden.

t Belgisch peerd het voader overdoan aan zien bruier, terwiel dat dij volsloagen onschuldeg aan t veurvaal west was. Mien laifde veur dij edele vaarvouters is doarbie nooit bekould. Nog aaltied heb k veurlaifde veur dij daaier.

Dokter in t zaikenhoes het t plekske op de 'foto s' nog ains noader bekeken en nam mien verhoal veur woar aan. Aal mit aal, was melleur van dien oard, dat e t underzuik stoakte, in ofwachten wat zoch messchain in toukomst nog veurdoun zol. End goud aal goud, moij mor reken.

29 oktober 2018