Lammert Voos.

Gedichten.

Snei

de snei dei over
't land joagt
mooi veur aansichtkoarten
duuster veur minsen
dei romantiek zain

ien kolde en vorst
en natte voutn'
waarmn'd bie
petreulium en holtkaachels
dei dood waalm'n

de grieze lucht
boov'n 't laand
woar bin'n noordse
blaauwe ainders?

eerst in lente of summer
is er weer echt licht
daampt de duusterte
oet oons kleern'
dreugt 't holt veur

de volg'nde tied
van vorst en snei
en aansicht'n en
kaachels dei
dood waalm'n

de grieze lucht
boov'n 't laand
woar bin'n noordse
blaauwe ainders?

Deventer, 10 september 2003

Verdwoalt.

veur Jan Kostwinder (1960/2001)

ströt is rauw
van aalle sigaretten
en de vingers broen
mor ains waarn' wie
veulbeloofnd' en jong

ik goan nait fot
als doe mie d'r
nait oetgoeist
ik goan nait fot
zolaang 't licht
nog braand

illusies wegspoult
mit liters passiebier
en 't laifst nog
ien 't gezelschop
van 'n slecht wief

verdwoalt ien
ons aign' stad
verdwoalt ien
ons aign' leefn'
ien ons aign' verleedn'

ik goan nait fot
als doe mie d'r
nait oetgoeist
ik goan nait fot
zolaang 't licht
nog braand

Deventer, 26 April 2003

Kobus en Siet

ol Kobus waas 'n echte reitdekker
hai klom op 't daak en dee sien waark
as 'r viel, naam 'r 'n borrel en see
verfluikt, 'k mot ja weer noar boovn'
trug, trug, trug 't daak op
desnoods mit pokkel vol draank
want dikke Siet joagt 'm weer omhoog
waarkn' sals doe, lui swien, belkt ze

veur de duuvel bin'k nait bang
mor wel veur mien wief!

ol Kobus hann' binn' rauw van 't reit
snöt veur oogn' van 't stof
as 'r niks sait vaalt 'r noar beneedn'
en doar staait dikke Siet!

veur de duuvel bin'k nait baang
mor wel veur dat wief!

Deventer, 12 maart 2003.

Kienderriempke

Mien opa
Haar een paartner
Veur 't leebn'
Heur noam was
Dubbele jonge groan jenever!

Deventer, september 2002

De Magneet

ien café De Magneet
klösn' biljartbaln'
fluikn' en lachn' klaantn'
rauw hangt doar de lucht
van peukn' ien pisgeut

oom Aobel smookt
Javoanse Jongens
geft van achter
tapkaast een reepke sukeloa
aan leutje vent

de gele kop op 't loatst
van de kastelain
opboard bie 't biljart
altied sien aigen
beste klaant bleefn'

Deventer, augustus 2002

Haarfst.

't Is hier so kold
't is hier so duuster
de wiend waait
deur ons hoeske
en hier is niks
om je achter te verschoel'n
ik bin ja moar 'n leutje keerl
sunder veul ideej'n

Domie De Kocq
wiest ons de weg
doarom ben wie
ja recht in leer
moar 't is hier so kold
't is hier so duuster
ons aller schreien in wiend
slechts gefluuster

Deventer meert 2002

Fersoepn'.

Mien ferhoal
is 't ferhoal van 't noordn'
't ferhoal van klaai
't ferhoal van foaln'

'n keerln dei fersoept
dei't ook nait meer wait
dei nait verder kiekt
dan woar sien schaduw staait

Wie koom'n hier nait weg
klaai zoegt en trekt
ons noar beneedn'
tot de jenever ons brekt

Waaist doe hou 't mot
vertel 't mie den
want doe waaist toch
da'k dien spaigel bin

Deventer, maai 2002