Klaas van Zonneveld.
Verhoal.
De Kapitein en ik...
Bie n veureg stokje op Dideldom : 'Gloepenshaard' gong t over n olle Opel Kapitän...
Loat dat nou aanlaiden wees n veur dit verhoal! Van t ain komt t aander hé!
Van n Kapitein Mobylette (ploffiets) n Solex, n poar Quickly's noar n luttje motortje (DKW 98 cc) en dou k dij in flaarden ree : n echte auto!
Omdat ik nait in dainst huifde (boetengewoon dainstplichteg) kon k deurgoan mit waarken en al gaauw, -nou ja!- haar k doezend gulden in t spoarpot...
En as je t riebewies den hoalt hebben, denk je as kwoajong al gauw an n autootje. In mien geval docht ik an n Fiatje, n NSU-tje en zokswat.
Nait te groot en betoalboar... Docht ik.
Bonzo Kuper -garageholder in Meulenhörn- brocht mie van dat idee of.
'Koop die doch n fatsounleke! Doe wilst toch nait om d hoaverklap mit zo'n ding noar de garage?'.
As vakman, overtuugde hai mie van zien geliek en ik aanderdoags op struun noar n grotere, minder kostende bolide.
Bie Doeko Blaauw in Mewolle zag ik veur thoes n mooie rooie en roeme auto stoan. Aigenlieks, docht ik dat Bonzo Kuper an zowat dochde.?
Noa wat hinneweer geproat kreeg k der honderd doalder of en kon k hom mitnemen veur doezend gulden...
Hai was nog mor drij joar old... As nij haar e, besef ik mie nou, roem drijdoezend gulden kost! Anno 2021 nait meer te begriepen!
Hai laip ain op tien en an belasten betuil ik fl. 12,50 per drij moand!
Veur n tientje haar k n volle tank bezine... Wat wil je meer!
Deur de weeke wuir e nait veul broekt. Maisttieds gingen wie der mit noar dancings as Beijering, Dommering, t Kraaienust en Dik in Delfziel.
En den haarn wie nog n spesioale oetgangsoavend. s Moandags noar d automaart op t Damsterdaip in Grunnen. n Belevenis van jewelste!
De handel begon pas as t duuster wuir en was tegen middernacht oaflopen.
Maineg wrakje ging doar veur n poar tientjes over in aander handen...
As je n handeloar vruigen noar de kwaliteit den wast voak: 'veur zover ik wait, mekaaiert der niks an'. En den dee e n poar passen over zied, zodat e veur d auto ston en vervolgde mit: 'ik stoa veur de gebreken...!' woarop de maisten deurluipen en n enkeling 'spot' bood op t ding.
Tegen n uur of elm besloten wie voak nog even noar t Keldertje te goan in de binnenstad... n Oer gezelleg ding en maisttieds n hoop schiere wichter!
Zo ook n olle vriendin oet Sodom, woaras ik n zetje mit goan haar.
As wie n kander troffen, klikde t weer vannijs en zo haar ik noa n blauw wiekenne zunner vrauwluu aait nog n schiere oafsloeten.
Noa twaalven ging der vanzulfs gain bus meer en den was zai wel te porren veur n lift noar Winschoot.
Mien kameroaden op veurbaanke en ik mit mien scharreltje op de achterbaanke...
Ain van mien kameroaden zee lestens nog: 'as dei Ol Opel proaten kon, den stonden wie noa zo n viefteg joar hier nog mit n dikke rooie kop...!'
En zo is t mor net! Ja, ie bennen mor ainmoal jonk!
Tot zowied mien eerste verhoaltje over de Kapitän.
Tussen t schrieven deur, kommen der aal meer belevenissen boven...
Messchain zet k dij ook nog op pepier en kennen ie n volgende moal lezen hou of t mit hom oaflopen is...
Ploatst: 4 april 2021
