DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Liekewel
 
evenzogoed

Gert van der Wal.

Verhoal.

| Neefkes | Kollega Jan | Fietsbaand | Dauwtrappen |
| Hernia | Missen en ófschaaid nemen | Mam ik hól van Die |
| Dieken | Zummerklaaier | Laamp vernijen | Dikdoun in toene |


Kollega Jan

Vandoag met kollega Jan oppad veur n melding van moesoverlast.

Om even n profielschets te moaken van mien kollega Jan, hai is op n sentimeter noa twij meter, as e zien hoar rechtop kamt is e boven de twij meter en blieft om t spinrag ien t hoar hangen as e deur n koustaal lopt. Wieder is e massief en vaaierkaant as n blok beton.
Zien traauwring is zo groot as n neusring van bolle, mit n haart van gold en oetstroalen van teddybeer, slimmer as dit zol t nait worden.

Op t adres aankommen lopen wie noar de veurdeur van de wonen, zeg mor kasteel, kollega Jan veurop, de knop vonden van de veurdeurbel, je waiten wel zo ain woar je aan trekken motten.
Jan trekt aan dij kopern knop en het t hail spul ien haand, wie heuren de bel aan binnenkaant in gaang op de plavuizen klettern.
Ik wol votdoadelijk vot runnen, mor Jan bleef stoan as of d'r niks loos was.
"Dat krieg je van dat old spul", zegd Jan en perbaaiert t hail spultje weerom ien gat te stoppen.
"Hest t weer veur n kander?"
"Joa aal kloar, tou dan Tammo, tik even tegen t roam aan den!"

Noa n tiedje word deur open doan deur n klaine luxe mevrouw, t hoar ien stutten of ze noar n feeske mot.
Jan: "goidag even".
"Uh, goede morgen mevrouw".
"Goede morgen heer".
Ik kiek achter Jan vot, "Oo u bent met z'n tweeén."
Wie: "Wij komen voor een melding van muisoverlast in de woning".
"Ja komt u verder heren."

Wie worden noar de keuken laait, bie ons thoes is koamer half zo groot.
"Hier in het keukenkastje onder de spoelbak zag ik een muis", zee mevrouw.
"Goed, we zullen eens kijken wat er aan de hand is mevrouw".
"Mooi heren, u red zich wel?"
"Joa, ja mevrouw."

Jan hoalt de spullen oet t kaske, stekt zien kop der in en zuikt noar sporen van moes.
Op dat moment striek ik mit haand over zien bain woarop Jan van schrik sikkom ien t aanrechtkaske stoan gaait.
t Hail spul komt ien bewegen, aanrechtblad staait d'r bol van.
En gieren of ik mit n vraauw op pad bin, Jan is ainglieks n beetje baang veur moezen, mor gain mìns wait dat.
"Ze binnen zo rap as wotter", zegd e.

t Verhoal gaait dat Jan in n naauwe ruumte n rödde bie zien overallpiep ienlopen is en mit wat omwegen aander piep weer oetkommen is.
Hier het e volgens mie nijmoods dansen leert, sunds dij tied binnen nauwe en donkere ruumtes nait zien affeer en gefde n schup tegen deur aan as e dizze ruumtes in mot.
"Waiten de rötten dat ik d'r aankom", zegd e.

En ik heb hier sprinten leert en magst mie leuven of nait k heb mien eerste pr lopen en mag k van gelok spreken dat e mie nait te pakken kregen het mit zien grode handen.



| Neefkes | Kollega Jan | Fietsbaand | Dauwtrappen |
| Hernia | Missen en ófschaaid nemen | Mam ik hól van Die |
| Dieken | Zummerklaaier | Laamp vernijen | Dikdoun in toene |

De Schriever
Noam: Gert van der Wal
Geboren:
Woont in: Scheemde
Schrift al:

Schrief verhoalen en vertelsels op Facebook, sunds begun twijdoezendtwaalf ien t grunnegs omdat luu mie dat vroagt haren. En de Grunningse toal zich der goud veur laint.
Ie ook?
Ie schrieven ook wel (ais) in t Grunnegers en willen joen verhoaltjes hier ook wel zain loaten?
Kiek den even op de openingsbladziede en vul t formeliertje in.
© 2000 - 2018 Dideldom.comBiewaarkt: 01-05-2017Bezuikers: Grunnegers veur elk.