DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Regentap
 
waterhoos

Daniël Wolgen.

Gedichten.


Ain tevreden mìns

Hai staait met de baaide bainen op de grond
zien vouten in t zaand
ain onkreukelboar beeld
alles wat hier beweegt respecteert vot de stilte
ain serene rust
dij hai met ain poar penseelstrepen vastlegt
jenever en vaave
en veur de rest allinneg moar zee.

Roestige Spieker

mörgenrood mörgenrood
d veumiddag sprekt van de dood

heur de vogels mit elkoar proaten
wel nait sprekt is der west
het zien stee verloaten
om noeit meer trugge te keren

dat geldt veur elkenain
ook veur de hoge heren
in de dood binnen wie geliek

de dood is gain racist
Mussolini wel ain fascist
Hietler ain haalfe Jeude

d ain staarft riek
d aander in de geude
moar hebben wie ook woarlieks leeft

t Pad van de laifde op t plattelaand

wel de laifde zuikt
huift zich nait te verboazen
dat ō allaank op t pad lopt

want wie verdroagen t onrecht nait
kieken nait bieziet
wanneer wie t lieden van ain aander zuggen
goan evengoud nait over de rugge
van onze noaste

ook oal trekken wie ons van god of gebod nog wat aan
wie loaten ain mins dai in nood is nait stikken
en geven aine dai op de grond ligt
gain trap noa

wie wiezen nait mit de vinger
moar doun aan innerluk verdaipen

haauwen die vot aine op de snoede
aast respektloos bist
mor helpen die weer overėnne
wanneerst spiet est

wie vergeten niks
mor vergeven gaauw

wie doun nait moeiluk
moar as ons dien kop nait aanstoat
komster bie ons nait in

Weest mor nait baang, lutje koppeltje!

k volg n spoor van troanen
laangs brokstukken
woar van alens had bluien kind
stroomt nou stoatkundeg gif en liggen d'leugens
te drieven op drasseg laand

d macht van Moloch het zien bek wied open
t vuur verschroeit t volk
mor haanden dai kinnen haandeln hebben heur haart
sloten
en doun niks boeten aigen veurdail

wat wie mit nander opbouwd hebben
wordt inains ofbroken
deur ainder lu
dij heur aigen olders muiteloos offern
op t altoar van aalbegeer

ik stoa eem stil
en kiek verbiesterd in t ronne
zug scheuren in d huzen en gezinnen
zunder waark
in heur aarmoude leegzogen
mor n massoal protest blift uut

n poar schoapen bloaten
de rest het de kop loaten hangen

Op bezuik

in t zwiegen
heur ik dien stem
uut n wied verleden
en vandoage

n jonk wichie
mit glinster-ogen
allaint veul older
in dizze stoule

zunder noam
dai bist vergeten
wenneer ik mien haand
op dienent leg

kieken wie mit zien baaident
uut t roam
trugge in de tied
stief tegen nander aan


De Schriever
Noam: Daniël Wolgen.
Geboren:
Woont: op t Knoal
Schrift al:

Ie ook?
Schrieven ie ook gedichten in t Grunnegs, en willen ie ze hier ook wel ploatsen?
Kiek den ais op de Openings bladziede en vul t formeliertje in.
© 2000 - 2018 Dideldom.comBiewaarkt: 25-01-2016Bezuikers: Grunnegers veur elk.