DideldomDe Grunneger vlaageGrunnen's Laidtop t Is mor n noam
Menu

BienoamenStip

Foto'sStip

GastenboukStip

GedichtenStip

LaidjesStip

LegendenStip

MopkesStip

NijsStip

ReactieStip

ReseptenStip

SchrieversStip

VerbindensStip

VerhoalenStip

ThoesbladStip


Wat is.
Ik zel der wel bie deurschaiten
 
ik zal er wel niets van krijgen

Alice Buurma.

Gedicht.


Mien veurjoar,

Doar trok ik de wiede wereld in,
och wat haar ik t noar mien zin,
t veurjoar is ja n wonderliek mooi geschenk,
ook as je der lopen as n "blinde vink",

Is dat nou n merel of een roodborstje,
stoa ik zomoar in n veurjoarsbosje,
doar snoof ik om mie tou,
hou kwaam k hier nou,
k leuf dat dij vogel n ekster wezen mot,
t zel wel, mor hou kom k hier nou weer vot,
k mainde da'k hier rechts kon goan,
woar komt dij kolle wind vandoan,
t gaait ja regen,
woar is mien veurjoar bleven,
door heur'k n lammetje blérn,
t komt van heul vérn,
en roek ik nait het nadde gras,
jaandomd, doar was toch n stoep, zoopas,
nou maag k mie wel even konsentreren,
zal'k dat din nooit leren,
kin mie der nait kwoad om moaken,
heurk doar nou n eendje kwoaken
ains kieken woar t grindpoadje is,
mis, k hebt aal mis,

Veurjoar loat mie mor even lös,
k luuster nou noar dij bus,
dij ried vlak bie, links,
heur toch hou dij vogel zingt,
t stoepke is din rechts van mie,
kin der mit mien stok net bie,
o, n poeste wind in rug,
t gaait mie zo ja hoast te vlug,
krieg stok nait hén en weer,
pols dut mie aal oardeg zeer,
door vuil k mie toch een waarme gloed,
t zunnetje schient op mien bliede snoet,
t oafritje mot vlak bie wezen,
zo kin k recht over steken,
nou nuver en rusteg dij bocht in draaien,
t zol noeit zo haard mouten waaien,
nog even din heur k t bushokje aal,
vouten optillen veur da'k vaal,
hier in dizze loan,
zingen aale vogels soam,
kin mie zulf wel omzeumen,
loop'k alweer te dreumen,

Stoa k bie n aander in toen,
k liek wel hartstikke doen,
wat zollen ze doar nou koken,
k heb nog noeit zukswat lekkers roken,
konsentreer die nou n pooske,
veurjoar mokst mie ja een zootje,

O mor k heb die zo laif,
k wol die wel vangen in n braif,
stuurn noar minsen woar k zo van hol,
nadde vouten wat vin k dat goor,

Geluden klinken mie as meziek,
wat liggen dij tegels ja ongeliek,
t muurtje van t apteek,
k docht da'k hoast bezweek,
vrachtauto's, putdeksel, n kind dij kriest,
n moeke, net n kwoaje hekse, dij is naait wies,
mit aal dat lewaai kin k nait heuren,
doar laacht n kind, most nait zeuren,

k heb vlezzen in glasbak dondert,
k loop aalsmor stom verwondert,
k roek de waarme, slovve grond,
k wil zingen, daanzen, springen in t rond,
kiek, dat beduil ik nou,
k loop zo om t betonnen poaltje tou,
houzoo t vaalt nait allemoal mit,
k wait even nait hou t in mekoar zit,
schietensbenaauwd, woarom nou juust,
hee, k vin n lekker dropke in buuts,
en al goa ik ook honderd moal schaif,
veurjoar blifst mie veur altied laif.


De Schriefster
Noam: Alice Buurma.
Geboren: 1953 in Delfziel
Woont in: Delfziel
Schrift al: n zetje...

In mien kindertied heb k zeuven joar in Vraislaand woond, mor doar heb k gelukkig niks aan overhollen!
Om reden da'k voak zaik bin, schrief ik nait in stoapels, mor... as k weer popiejopie bin, nou din...
Het wonderschone leven is ja zo vol Grunninger verhoalen, gedichten en laidjes...

Ie ook?
Schrieven ie ook gedichten in t Grunnegs, en willen ie ze hier ook wel ploatsen?
Kiek den ais op de Openings bladziede en vul t formeliertje in.

Dideldom.comBiewaarkt: 04-04-2007Bezuikers: Grunnegers veur elk.